share this article

السبع تمن ساعات على الطريق وإحنا مسافرين شرم كانوا دايماً هاجس لينا وقت السفر، لكن دلوقتي الموضوع هيختلف كتير والوقت هيقل للنص تقريباً، بعد افتتاح طريق شرم الشيخ الجديد، اللي نفذته 3 شركات وطنية بتكلفة حوالي 3 مليار و500 مليون جنيه، فمن بعد النفق الطريق هياخد منك 4 ساعات بس لحد شرم الشيخ.

الطريق الجديد هيخلي المسافة بين القاهرة وشرم الشيخ حوالي 450 كيلو، وهيمر بمدن راس سدر وأبو زنيمة وأبو رديس وطور سينا وبعدين شرم الشيخ بقى، واللي بيسرع الدنيا كمان إنه مبيعديش على أي مدن ولا مناطق سكنية.

الطريق فيه 3 حارات في كل اتجاه، بعرض 25 متر في كل اتجاه برده وده طبعاً هيسهل الحركة حتى لو الكثافة عالية، ده غير إنه هيقلل نسب الحوادث، خصوصاً إن الطريق بيتفادى المنحنيات الخطيرة، وفي نص الطريق في جزيرة بتفصل بين الاتجاهين لتفادي الحوادث.

وتقدر من خلال كوبري ١٠٩ على طريق السويس إنك تدخل فيه على طول في اتجاه النفق، بدل ما تاخد يوتيرن من طريق السويس، وبعد كارتة عيون موسي على طول ممكن تدخل شمال للمنطقة الصحراوية وتاخد الطريق الجديد، وتسيب الطريق الساحلي القديم، مع العلم إن في وصلات من المدن الساحلية للطريق الجديد.

وهتلاقي 14 بنزينة على جانبين الطريق، 7 وأنت رايح و7 وأنت جاي، بين البنزينة والتانية 50 كيلو تقريباً.

المصدر: المصري اليوم