share this article

الموضوع ده اتنشر لأول مرة علىمشروع سفر، ويعاد نشره في Safareya بالإتفاق مع إدارة الويب سايت. 

الترانزيت من الحاجات اللي كلنا بنقابلها في معظم رحلات الطيران. في ناس الترانزيت بيبقى بالنسبالهم حاجة كويسة، وفي ناس بتبقى مش طايقة نفسها بعد ما بيوصلوا البلد اللي عايزين يروحوها بسبب الترانزيت.

لو تذكرة الطيران كانت أرخص من سعرها الطبيعي أو لو رايح بلد بعيدة عن مصر زي أمريكا أو أستراليا، يبقى في احتمال تكون الرحلة متقسمة على جزئين، بمعنى إنها هتقف في بلد الأول غير البلد اللي انت عايز تروحها، وهتستنى شوية في المطار، بعد كدة تاخد طيارة تانية للبلد اللي انت رايحها. في كذا عامل بيحدد موضع الترانزيت وقد إيه هيكون مفيد أو مقرف بالنسبالك.

قبل ما تقرر إنك تحجز رحلة هتقف في بلد تانية، اسأل نفسك الكام سؤال دول.

1- الترانزيت هيبقى قد إيه؟مصدر الصورة: gaijingojapan

أهم حاجة تاخد بالك منها وانت بتحجز، لو الترانزيت مش كتير، فديه حاجة كويسة ووحشة في نفس الوقت. كويسة لإن معنى كده إنك مش هتطول وهتوصل بسرعة، من غير ما تضطر تستنى بالساعات في المطار مش بتعمل حاجة، لكن في نفس الوقت لازم تبقى عامل حسابك إنك لو تهت في المطار أو ضيعت وقت، ممكن تفوتك الطيارة التانية، في الحالات ديه لازم تنجز بمجرد ما تنزل من الطيارة وتشوف الصالة اللي محتاج تروحها، وتمشي ورا اليُفط وصولاً للجوازات أو التفتيش لغاية الطيارة التانية.

*اقرأ أيضاً: ازاي تحجز تذاكر طيران رخيصة

رحلة طيران فيها ترانزيت

أما لو الترانزيت طويل، فمهم برضه تحط في بالك قد أيه هيكون طويل، يعني ساعة ونص ولا ٨ ساعات؟ لإن لو إنت مسافر أوروبا، ده هيحدد هتلحق تخرج برة المطار وتشوف البلد اللي إنت مستني فيها، بما إن الشينجن بتدخلك عدد من الدول. ده لو البلد دي من ضمن دول الشينجن، ولا مش هتلحق وهتضطر تقعد تستني في المطار. وده بيودينا للسؤال اللي بعده.

2- المسافة بين المطار والمدينة قد إيه؟مصدر الصورة: mpora

في حالة إنك رايح أوروبا، وطيارتك هتقف ترانزيت في دولة من دول إتفاقية الشينجن -اللي من حقك تخشهم كلهم مدام معاك الفيزا - فهييجي في دماغك على طول تضرب عصفورين بحجر وتضيع وقت، وكمان تزور بلد زيادة، بس قبل ما تعمل كدة، مهم تفكر في الوقت اللي هيضيع في الجوازات، في التفتيش، وفي المواصلات وكل الإجرائات الروتنينية ديه، واضربها في إتنين لإنك هتعملها تاني لما ترجع المطار عشان تاخد الطيارة التانية.
تاني حاجة محتاج تبحث فيها وتعرفها هي المسافة من المطار للمكان اللي عايز تروحه أو على الأقل لوسط البلد. لو واحد مثلاً نازل ترنازيت كام ساعة في مصر، أكيد مش هننصحه إنه يروح من المطار للأهرامات أو خان الخليلي، لأنها هتاخد منه وقت كتير بالذات لو الدنيا زحمة. إنت محتاج تعرف نفس الكلام، لو هتستنى في ألمانيا لمدة ثلاث ساعات، والطريق من المطار للمكان اللي هتروحه هياخد نص ساعة لوحده، يبقى بلاش أحسن لإن إنت كدة بتتكلم في ساعة ضاعت من الثلاثة، ما بالك بإجراءات المطار وشوية الوقت أللي هتتوه فيه.

3- لو نزلت البلد اللي فيها ترانزيت، إيه المواصلات اللي هركبها عشان أرجع المطار؟

السؤال ده هتسئله لنفسك في حالة إنك قررت تسيب المطار، وكان عندك وقت كفاية تتفسح في بلد الترانزيت. ومش محتاجين نوضح قد ايه مهم تكون عملت بحث بسيط على الإنترنت تعرف فيه المواصلات أللي هتركبها عشان توصل من المكان اللي هتكون فيه للمطار، لإن محدش هيحب إن الطيارة تفوته أو إنه يركب تاكسي للمطار يدفعله فلوس كتير. 

4- في واي فاي ولا لأ المصدر: ESS-ART

رحلة البحث عن أحلى سعر تذكرة طيران بتخلي الواحد ساعات يلبس نفسه في ترانزيت 15 ساعة وأرقام مخيفة كده، الموضوع مستاهل برضه إن الواحد يوفر 3-4 آلاف جنيه، بس تقضية وقت في المطار مش ألطف حاجة في الدنيا. عشان كده لازم تعرف المطار اللي إنت رايحه فيه واي فاي ولا لأ. لحسن الحظ في خريطة تفاعلية فيها باسوورد واي فاي في أكتر من 300 مطار، وتقدر تعرف منها لو المكان اللي هتنزل فيه ترانزيت عنده واي فاي مجاني.

5- إيه موقفهم من الشطافة؟

للأسف الشديد اختراع الشطافة موصلش كل دول العالم الحديث، وممكن جدًا تلاقي نفسك دخلت الحمام في مطار بلد أجنبي وملقيتش فيه شطافة. عشان كده حاول تدور على النت قبل ما تسافر وتعرف عندهم الاختراع ده ولا لأ، عشان لو لأ تاخد احتياطاتك وتجيب Fresh Buzz قبل ما تسافر.

6- تقدر تنام هناك؟ المصدر: CNN

ساعات المطار بيبقى فيه أماكن مخصصة للنوم أو فنادق كمان، حاول تدور وتعرف لو الاختيارات دي موجودة ولا لأ عشان هتفرق معاك جدًا.