share this article

السعودية حاطة السياحة في أولى أولوياتها دلوقتي، وكل شوية بتعمل حاجة جديدة عشان تجذب عدد أكبر من السياح، بعد سنين طويلة من الانطواء على نفسها واعتمادها على سياحة الحج بس، وفي الإطار ده أعلنوا عن مشروع "البحر الأحمر" السياحي ضمن رؤية 2030، وهو عبارة عن مطار دولي الهدف منه إنه يحط السعودية على خريطة السياحة العالمية.

المشروع ده مفروض يخلص في 2022، على إنه يستوعب مليون مسافر سنويا، بسعة توصل لـ900 مسافر في الساعة، خلال الرحلات الداخلية والدولية اللي هيستقبلها وتخرج منه.

الموقع الرسمي لمشروع "البحر الأحمر" قال إن تصميم المطار هيكون صديق للبيئة بيحاكي جمال الطبيعة اللي هتكون محاوطاه، وجون باغانو الرئيس التنفيذي للمشروع قال إن ألوانه هتكون مستمدة من الصحرا عشان تعيش السياح بعض الأجواء اللي تديهم الإحساس بالراحة والرفاهية من أول ما يخرجوا من المطار لحد ما يوصلوا للمكان اللي رايحينه.

ومن المفترض يكون مشروع المطار الدولي وجهة سياحية فاخرة، بمساعدة التكنولوجيا الذكية عشان تسهل استقبال الزوار، وهتساعد على استحداث معايير جديدة للتنمية المستدامة في السعودية، عشان تحطها على خريطة السياحة العالمية.

المصدر: The National