share this article

كل فترة لازم نسمع عن اختراع جديد عملته دبي؛ وبما إنها قدرت تبقى رقم واحد للسنة الخامسة على التوالي في قائمة المدن اللي بيجيلها أكتر عدد زوار في السنة؛ بـ15 مليون زائر في سنة 2018، يبقى من الطبيعي إن أول حاجة يهتموا بيها هي المطار اللي بيستقبل الناس دي كلها، عشان كده عملوا تاكسي جديد ينقل المسافرين جوة المطار للبوابات أو الصالات المختلفة حسب كل مسافر.

تاكسي دي اكس بي Taxi DXB بقى متاح في صالة رقم 3 وبيقدم خدماته للناس مجاناً، بس كبداية ومرحلة أولى ولأنه مفيش حالياً غير 15 تاكسي فقط؛ خصصوا الأولوية للمسافرين كبار السن والعائلات اللي معاها أطفال، لكن لو مفيش حد مستعجل أو من ضمن الفئات اللي ليها الأولوية؛ يبقى ساعتها تقدر تستفيد من التاكسي بإنه ياخدك جولة في المطار تتفرج عليه وتتفسح.

ورغم إن حاجات كتير من اللي بيعملوها بتعتبر رفاهيات زي برضه لما عملوا صالة جديدة في المطار للأطفال اللي مسافرين لوحدهم، إلا إن المسئولين عن المطار بيأكدوا دايماً إنها بتبقى تلبية لإحتياجات المسافرين ومبادرة لتقديم خدمات مكانتش هتبقى موجودة لو مش هيبقى ليها فايدة.

لو بتخطط تسافر قريب، متنساش تبص على دليل سفرية لكل اللي محتاج تعرفه عن دبي.

المصدر: Gulf News