share this article

موسم الكريسماس قرّب، وطبعاً عشان ده وقت زحمة أعياد ورأس السنة وكل الإحتفالات اللي بتبقى بتحصل في كل حتة في العالم، يبقى دلوقتي هو الوقت المناسب اللي تبتدي تخطط فيه هتروح فين، وفي أمريكا عملولك أكبر متاهة من أضواء وزينة الكريسماس، يعني زي ما بنروح نتوه في المعادي كده بس الفرق إن دي معمولة في إطار اللعب والفسحة.

الحدث ده بيتعمل بقاله 9 سنين دلوقتي لكن السنة دي هيبقى الأكبر في العالم على مساحة 8000 آلاف متر مربع، وفي 3 أماكن مختلفة بين سياتل وفلوريدا وواشنطن من 22 نوفمبر لـ29 ديسمبر، لدرجة إنهم بيطلبوا كل شوية عمّال جداد ينضموا للشغل اللي مش بيخلص عشان يخلّصوا كل الديكورات والأضواء اللي هتتحط على طول طريق المتاهة.
 

التذاكر أسعارها بتبدأ من أول 17 دولار (حوالي 270 جنيه مصري) مش عشان ندخل نتوه في الطريق المنوّر وخلاص؛ لكن فيه أسواق كتير Christmas markets وأكل ومنتجات معمولة للمناسبة دي مخصوص، غير العروض الترفيهية اللي هتبقى شغالة حسب كل حديقة بتروحلها طول الطريق، وكمان تراك جليد للي عايز يتزحلق، وألعاب وأنشطة كتير للأطفال والكبار، وأهم حاجة طبعاً مينفعش حدث معمول للكريسماس وسانتا مايكونش موجود!

تقدروا تحجزوا من دلوقتي لأي مكان من الـ3 أماكن اللي هتبقى فيها متاهة الكريسماس من اللينك بتاعهم: enchantchristmas.com

المصدر: ABC Action News