share this article

ليجولاند .. الملاهي أو مدينة الألعاب اللي كل حاجة فيها عبارة عن ميكانو هتفتح أكبر مدينة ملاهي في العالم وهيكون مكانها في أمريكا، واختاروا يوم 4 يوليو 2020 عشان يبقى يوم الإفتتاح، بما إنه وقت الإحتفال بعيد الإستقلال في أمريكا والناس بتبقى أجازة وبتدور على خروجات وسفريات جديدة.

الملاهي الجديدة هتبقى في هادسون فالي اللي على بُعد 100 كيلو من نيويورك، وشغالين دلوقتي في أعمال البناء؛ المباني الحقيقية يعني مش بيبنوا ميكانو! ومستنيين بقى حوالي 15 ألف نموذج متركب من الميكانو بأشكال كتير عشان يتحط في الملاهي، غير الألعاب العادية زي القطار وعريبات التصادم -زي أي ملاهي يعني- بس طبعاً معمولة بشكل الميكانو.

كمان بيبقى فيها أنشطة وكورسات صغيرة للأطفال زي إنهم يتعلموا يسوقوا العربيات أو يتعلموا شغل رجال المطافي، ده لأن الملاهي متاح فيها اشتراكات سنوية وشهرية للعائلات، بس هتلاقي فيها من أول 63 دولار للتذكرة (حوالي 1000 جنيه مصري) لحد 210 دولار (3400 جنيه) للإشتراكات السنوية اللي بيبقى فيها امتيازات كتير في الأماكن اللي تقدر تدخلها والألعاب وكمان عدد المرات المسموحة ليك في السنة.

المصدر: Lonely Planet