share this article

بما إننا قاعدين في البيت ومش لوحدنا بس؛ ده العالم كله بقى من منازلهم، وطبعاً عملت كل المكالمات التليفونية، ونضفت، وقلبت في الذكريات، وعملتوا صورة الوركينج فروم هوم، وبعدين في التشالينج بتاع إنستجرام، وعملت كل اللي ممكن يتعمل خلاص وهتطق من القعدة، وطبعاً مش عارف تسافر؛ بس لسه في طريقة، إنك تتفرج على فيلم ياخدك في أجازة لطيفة سفرية سريعة وإنت قاعد في البيت، قوم حضّر مشروبك المفضل وطبق تسالي حلو كده على ما أنا أجيب مقرمشات وبيبسي دايت ونغطس في أفلام هتنسينا الحبسة دي .. وعد مني مش هحرق الأفلام رغم صعوبة ده بالنسبة لي.

(Eat Pray Love (2010المصدر: VistaPointe

أكيد شفته أو على الأقل سمعت عنه، لأنه فيلم سفر من الطراز الأول، وغير كده ده بطولة جوليا روبرتس، بس هو فيلم هياخدك في رحلة لطيفة متقسمة لـ3 أجزاء، بترتيب اسم الفيلم، فهي بتكتشف الأكل في إيطاليا، وبتلاقي التوازن والسلام النفسي في الهند، وبتقابل الحب في إندونيسيا، ومعاهم بتكتشف نفسها كل الرحلة دي في أقل من ساعتين.

(Vicky Cristina Barcelona (2007المصدر: Glamour Magazine

برشلونة من المدن اللي كتير بيحلم يزورها، وبما إن الظروف مش سامحة، والموانع دلوقتي بقت أكبر من التأشيرة والفلوس؛ بس البديل إنك تتفسح مع فيكي وكريستينا، ومش هتحس أبداً إن جمال سكارليت جوهانسون مخبي شخصية برشلونة؛ مخرج الفيلم وودي آلن مابيهزرش، وهتشوف الحياة اليومية وجمال الشعب الأسباني في رحلة لطيفة، كل ده مع إضافة بينولبي كروز اللي أخدت أوسكار عن دورها في الفيلم ده، وخافيير بارديم .. أعتقد مفيش حاجة تانية تتقال تقنعك بالفيلم، الفيلم ده حلو تشوفه بالنهار مع كوباية شاي وكيك كده.

(2006) The Holidayالمصدر: HabituallyChic

مش ضروري نكون في الكريسماس عشان تتفرج على الفيلم ده، في الواقع كاميرون دياز وكايت وينسلت تتفرج عليهم في كل وقت، المهم الفيلم ده بياخدك في مغامرتين مختلفين في نفس الوقت بالتوازي واحدة في إنجلترا، والتانية في أمريكا، لما البطلتين بيأخدوا أجازة ويبدلوا بيوتهم من خلال مواقع تأجير البيوت للمسافرين، وتبدأ كل واحدة تكتشف وتتأقلم على الحياة دي، ينصح بالمشاهدة ليلاً من تحت البطانية مع مج هوت شوكليت.

(Wild (2014المصدر: Time

من الاسم كده تعرف إنه فيلم لمحبي المغامرات، أو ممكن تستغلها فرصة وتبدأ تتعرف على المغامرات وتحبها، الفيلم ده أحداثه حقيقية مبنية على رواية بنفس الاسم كتبتها شيريل سترايد، واللي بيقوم بدور شيريل في الفيلم هي ريس ويذرسبون؛ واترشحت للأوسكار بسبب الدور ده، البطلة بتقرر إنها تقوم برحلة مشي جبلي لمسافة 1,100 كم عشان تتخطى مأسآة حصلت في حياتها، ومع أحداث الفيلم بتبدأ تكتشف وتتعلم وترتب حاجات كتير في حياتها وحياتك إنت كمشاهد، الفيلم مليان بجمال الطبيعة وجمال تمثيل ريس ويذرسبون البطلة، بس هيغير في نظرتك لحاجات وهيفكرك ليه بنحب المغامرات، يستحسن تشوف الفيلم ده الصبح هتلاقي إن الجو مناسب أوي.

(The Darjeeling Limited (2007المصدر: OurGoldenAge

الفيلم ده بيحسسك باللخبطة والزحمة وبتدور أحداثه بين 3 إخوات بيحولوا يرجّعوا علاقتهم ببعض بعد وفاة أبوهم، وده بيحصل في رحلة للهند، وفي جزء من الفيلم بيكون في القطر، وفي الرحلة دي بيكتشفوا أسرار عن بعض وبيحصل معاهم سلسلة من المواقف الطريفة اللي بتخلي الفيلم مغامرة أحلى وألطف ومش متوقعة لهم زي بالضبط ما هتكون إنت مش متوقع إيه اللي هيحصل، ده من الأفلام اللي مناسبة جداً لوقت بعد الظهر كده.

(The Before Trilogy (1995, 2004, 2013المصدر: cinapsa

سلسة أفلام غنية عن التعريف، ومشهورة بالرومانسية والحب، بس المخرج ريتشارد لينكلاتر بارع في إنه يعرض الوقت والمكان من خلال قصة الحب دي، فبنشوف إيه اللي بيحص للأبطال في أزمنة مختلفة في أماكن مختلفة وإزاي العوامل دي بتغير فيهم وفي شخصيتهم، بنشوف جزء من علاقتهم في إطار الزمن والمكان اللي بتدور فيه الأحداث، في أول فيلم بيكونوا في قطر في فيينا في لقائهم الأول، وبعدين يتقابلوا تاني في باريس، وأخيراً بنشوفهم مع عيالهم في اليونان، يوم أجازة كده وظبط القعدة وشد التلت أفلام ورا بعض، وتبقى لفيت أروبا وأنت في مكانك المفضل.

(Lost In Translation (2003المصدر: Pin

بما إن آسيا مستحيل تروحلها دلوقتي، فالفيلم ده هيفرجك على طوكيو، وفي نفس الوقت هتشوف قصة لطيفة بين إتنين أغراب بيتقابلوا في طوكيو، وأحداث كتير بتدور بس مش بتحس إنك غرقان لكن هي مناسبة مع زحمة وسرعة طوكيو، فبتشوفها وتفهمها أحسن، دي أسرع رحلة ممكن تعملها لطوكيو في حياتك وميعادها هيكون في الليلة اللي تختارها، ده فيلم ليلي جميل.

(In Bruges (2008المصدر: NewsJoin

لهواة أفلام الجريمة حان الموعد، الفيلم ده بيحكي عن قاتل بيهدي اللعب شوية بعد ما أزعج النظام والحكومة في مدينة أوروبية، والفيلم ده كان كافي جداً إنه يخلي بروج من أكتر المدن اللي بتتزار في بلجيكا بسبب فيلم، لأن المخرج أبدع في إنه يبين جمال المدينة في المشاهد بتاعته، وبالرغم من الفيلم الموتر والقصة والأحداث إلا إنك كمان هتستمتع بالجمال بتاع المدينة، ده فيلم لبعد منتصف الليل فيستحسن في الويك إند.

(The Fall (2006المصدر: archdaily

ده بقى الفيلم اللي هيمتع عنيك وهيوريك جمال الكوكب بتاعنا وهيلف بيك في 18 بلد، منهم جنوب أفريقيا، التشيك والهند، كل ده من خلال قصص خمس أبطال بيحكيها واحد ممثل خدع سينمائية وعنده إصابة ف راح المستشفى، وكان السرير اللي جنبه فيه، بنت صغيرة فبدأ يسليها ويحكيلها القصص دي، وإنت هتتسحل جواهم ومش هتبقى عارف إيه الحقيقة وإيه الخيال، بس هتنبسط في نهار لطيف وإنت بتتفرج على الفيلم ده.

(Mamma Mia (2008) & Mamma Mia: Here We Go Again (2018المصدر: Cabaretbelfast

أفلام صيفية لطيفة خفيفة جميلة مليانة غناء وحركة ورقص وبحر وطبيعة، وغير ده كله فيه ميريل ستريب، حاجة كده ترفه عننا في الوضع اللي إحنا فيه ده، القصة دي مكانها في جزيرة يونانية اسمها "كالوكاري"، من إختراع صناع الفيلم بس معنى الإسم صيف، الجزء الأول فعلا متصور في جزيرة يونانية، والتاني متصور في كرواتيا، ده فيلم صباحي بإمتياز، أو ويك إند وتشد الإتنين ورا بعض مع كوباية لمون منعشة كده وتخليك فريش.

(Call Me By Your Name (2017المصدر: NewYorker

قصة حب رومانسية في التمانينات، ومش بس كده لا دي بتدور أحداثها في إيطاليا، فأنت هتاخد رحلة في الصيف الإيطالي وتركب العجلة، وتشوف الريف وتعدي على البحيرات وتاخد عومة سريعة كده، وتعيش الأحداث الرومانسية، وللبنات هتستمتعوا بتيموثس شالمت، ومتنسوش وانتو بتتفرجوا تدعوا لإيطاليا كمان، وأعتقد ده ممكن يكون فيلم عائلي لطيف لوقت بعد الظهر.

(French Kiss (1995المصدر: eclecticpop

ميج راين، أعتقد كده كل الكلام اتقال، ما هو مفيش أخف ولا أجمل منها في الأفلام الرومانسية الكوميدية، هي دي سكر محلي محطوط على كريمة صحيح – واضح إني معجبة منحازة ووحشتني ميج أوي – المهم الفيلم بيحكي إنها بتخاف تسافر بس بتضطر تروح فرنسا عشان تنقذ علاقتها بخطيبها، بس بتقابل "كيفين كلين" اللي بيساعدها في مسعاها وبيحصل حبة حاجات، تتفرج إمتى، كل وقت هو وقت ميج راين.

(Crazy Rich Asians (2018المصدر: IMDB

الفيلم هيلففك سنغافورة، مرة تانية بتشوف بلد في آسيا من غير ما تطلع بره باب الشقة، المهم الفيلم ده بيحكي عن بنت آسيوية أمريكية، راحت تقابل عيلة خطيبها الغنية جداً اللي عايشين في سنغافورة، وإحنا نستمتع بالرحلة دي ونشوف معالم البلد في إطار الأحداث اللي بتدور، فيلم لطيف تشوفوا كده وإنت مأنتخ بعد العدا، بس تبدأوامع الأكل.

(The Secret Life Of Walter Mitty (2013المصدر: wallup

شخص سرحان في أحلام اليقظة؛ أخيراً بتجيله فرصة عمره اللي بتاخده في مغامرة عمره ما تخيلها وهو في أجمح أحلامه على مكتبه في المجلة اللي بيشتغل فيها، بيجري ورا صورة تستحق تكون على الغلاف والصورة دي بتلففه من مانهاتن لجرين لاند، أيسلندا، وكمان الهيمالايا، لمشاهدة بن ستيلر في ثوب مختلف جهز معاد الساعة 6 المغرب للفيلم ده.

(2007) Two Days in Parisالمصدر: JustWatch

أصل أكيد يعني باريس لها نصيب، ماريون وجاك في علاقة مش مفهومة أوي، المهم وهما في رحلتهم لأوروبا؛ ماريون قررت إنها تاخد جاك يشوف أهلها في باريس اللي قرروا يقعدوا فيها يومين، ومش بس كده هي بدأت توريه باريس من وجهة نظرها الأحلى بقى، في الفيلم ده رغم إن باريس معروفة إنها مدينة رومانسية إلا إنهم بيسيبوا بعض في باريس، ده فيلم هتتفرج عليه في الويك إند لأن له جزء تاني في نيويورك.

(Only Lovers Left Alive (2013المصدر: Alfajer

الفيلم ده بيورينا آدم وحوا كإتنين مصاصي دماء وعمرهم 2000 سنة، وطبعاً زمانهم زهقوا واكتئبوا بما إن بقالهم كتير هنا، بيتقابلوا تاني هي بتكون عايشة في طنجة في المغرب، وهو عايش في ديترويت، المهم إن إحنا بيكون عندنا فرصة نشوف مكانين مختلفين في نفس الوقت، وطبعاً أحداث الفيلم بتكون بالليل لأنهم مصاصين دماء، وعشان الجو ده إنت كمان هتتفرج بالليل.

مع ليستة الأفلام الغربية الجميلة دي في كمان حبة أفلام عربي ممكن تتفرج عليهم، أولهم "فول الصين العظيم"؛ فيلم ماتزهقش منه أبداً مهما اتفرجت عليه، وياريتك يا هنيدي كنت نيمت الصين من المغرب بدل اللي إحنا فيه ده، ومع "فول الصين العظيم" فيه كمان "أفريكانو"، و"همام في أمستردام"، "حرامية في تايلاند"، ولو بتحب أفلام أقدم من كده فعندك "النمر الأسود"، وطبعاً في الأبيض والأسود "مطار الحب" لفواد المهندس وشويكار، ولو من هواة الأكشن عندك "الديلر"، "الرهينة"، وطبعاً في "تايه في أمريكا"، "أمريكا شيكا بيكا"، و"بخيت وعديلة - الجزء التالت"، طبعاً "خرج ولم يعد"، ومن ترشيحاتي أنا الشخصية هقولك أفلام يوسف شاهين؛ هي أفلام لو مش بتاخدك في رحلة لمكان تاني زي "إسكندرية ليه"، "إسكندرية كمان وكمان"، "إسكندرية نيويورك"، فهي بتاخدك في رحلة من نوع تاني، زي "المصير"، "الابن الضال"، "المهاجر"، "الآخر"، وترشيح أخير مني فيلم "أرض الأحلام" رحلة مختلفة عن كل دول.