share this article

موقع TripAdvisor من أكتر مواقع السفر المستخدمة على الإنترنت، بقرابة النص مليار مستخدم شهريًا، وبيديهم الفرصة إنهم يعرفوا معلومات عن أي حاجة محتاجين يعرفوها في البلد اللي مسافرين له، من أول الإقامة لحد أفضل بار ومطعم في البلد. مع كل ده، برضه الموقع كان عليه هجوم مؤخرًا بسبب تقارير ودعاوى تحرش جنسي متوجهة لشوية من المؤسسات اللي بيدعمها، 1,100 السنة اللي فاتت بس.

بسبب المشاكل دي، الموقع قرر يزود خاصية جديدة تدي للمستخدمين فرصة إنهم يوصلوا لمعلومات عن أمان مكان معين. أول تطبيق للخاصية دي هيبقى في صورة أوبشن "مراجعة أمان للمستخدم" اللي هتخلي المستخدمين يدوروا على الفنادق أو أي حاجة تانية ويشوفوا لو في أي حوادث تحرش أو اعتداء حصلت فيهم. الخاصية دي برضه هتبقى متاحة من خلال 28 لغة اللي الموقع بيهم، ومن خلالها، هيقدر أي حد يعمل فلتر يشوف بيه أي حوادث سواء تحرش، تخدير، سرقة، أو غيرهم.

الأوبشن التاني من خلاله موقع TripAdvisor هيزود اخطار فوق كل مراجعة عن مكان، فيه معلومات متعلقة بأمان المؤسسة، عشان يخلي الموضوع أسهل إن المستخدم يوصل للمعلومات دي بالذات في وسط باقي المراجعات المختلفة اللي بتبقى موجودة.

في جميع الأحوال، ناس كتير شايفة النظام فيه مشاكل برضه، عشان هيبقى مطلوب من الضحايا إنهم يحكوا تفاصيل الواقعة، والمؤسسة اللي تحت الاتهام هيبقى عندها فرصة الرد علانية على الضحايا. TripAdvisor كمان مش هيوقع أي عقوبات على المؤسسات اللي هيثبت عليها وقائع تحرش أو اعتداء، يعني ممكن فندق يحتفظ بتقييمه العالي بعدها عادي. بس TripAdvisor قالوا إن التغييرات دي ما هي إلا بداية لخطوات تانية هيتم اتخاذها في المستقبل لتحسين المعلومات المتاحة عن الأمان للمستخدمين.

المصدر: The Guardian