share this article

بين دبي وعُمان مسافة قصيرة جداً بتخليها وجهة لناس كتير سواء من دول الخليج عموماً، أو المقيمين في دبي وبيدورا على فسحة في بلد تانية، 4 ساعات بالعربية تبقى في العاصمة مسقط وممكن ساعتين بس لو مش محتاج توصل لحد العاصمة وعايز تروح مكان فيه مناظر طبيعية أو تخييم في الصحراء.

لحد دلوقتي الموضوع كان سهل لأن الفيزا بتاعتها كانت عند الوصول على نقطة الحدود لأي حد مقيم في دولة الإمارات أياً كانت جنسيته، لكن من أول نوفمبر قرروا يغيروا النظام ويخلوها بفيزا أونلاين بدل الفيزا عند الوصول، وشرطة عمان نشروا تويتة شرحوا فيها بما معناه يعني إن الموضوع مش تكدير للناس اللي كانت بتستسهل تيجي على طول، لكن الهدف منه إنهم ينظموا الدنيا أكتر على المسافرين وعلى نقط حرس الحدود.


كل المطلوب إنك تملى الفورم اللي على الموقع الخاص بالحكومة العمانية؛ تحط صورة جواز سفرك وصورة شخصية ليك 4X6، وبعدين تستنى 4 أيام لحد ما تجيلك الفيزا، وأسعارها هتبقى من أول 13 دولار أمريكي (210 جنيه مصري) لحد 130 دولار أمريكي (حوالي 2000 جنيه) على حسب جنسية المسافر اللي بيقدم على الفيزا، لكن الكلام ده كله للمقيمين في دول الخليج العربي، لو كنت مقيم في أي دولة تانية؛ ساعتها بيكون التقديم من خلال سفارة عمان في بلدك أو شركات السياحة، أو الحل اللي بيروحله ناس كتير وهو الفيزا المشتركة بين دبي وعمان .. ودي حاجة عملوها لتنشيط السياحة بين البلدين عشان اللي رايح مدينة في الإمارات مثلاً وعايز يعدّي في السكة يتفسح في عمان.

المصدر: The National