share this article

طول الوقت بنسمع على جروبات السفر عن كمية الناس اللي نفسها تطلع رحلة لأوروبا وتأشيرتها بتترفض، وقبل أي خطة بتتحط لأي رحلة لازم تحسب نسبة القبول والرفض من كل سفارة وأنهي هتديلك أكبر احتمال للقبول؛ وطبعاً لو قلتلك إن نسبة المصريين اللي قدموا عشان ياخدوا فيزا شنجن واتقبلوا هي 78% مش هتصدق، لأن الحكاوي اللي بنسمعها تخلينا مقتنعين إن نسبة الرفض 98% مثلاً وإن فيه 3 بس بيعرفوا ياخدو فيزا شنجن كل سنة! لكن دي فعلاً النسبة اللي طلعت في تقرير مركز المعلومات الخاص بفيزا شنجن عن نسب قبول ورفض الفيزا للمصريين في 2018. 

المصريين قدموا 190,150 طلب في القنصليات المختلفة التابعة لدول الإتحاد الأوروبي عشان ياخدوا فيزا شنجن، منهم 148,641 طلب تم قبولهم واخدوا الفيزا بالفعل، و37,901 طلب تم رفضه، وكانت السويد في المركز الأول كأكتر دولة قفلت الباب في وش المصريين بنسبة رفض 44%، وبعدها بلجيكا بنسبة 34%، وواضح إن فيه إقبال كبير من المصريين على فرنسا لأنهم قدموا 46,078 طلب ليها لوحدها.

طبعاً مفيش حد هيقولك دي البلد اللي فيزتها مضمونة وتمشي وراه؛ لأن في النهاية فيه نسبة حظ كبيرة جنب كمية الورق الكتير اللي المفروض تجهزها قبل ما تقدم ورقك لأي سفارة، مع مراعاة التعديل البسيط اللي أعلنوه الفترة اللي فاتت إنك بقى لازم تدخل أوروبا عن طريق البلد اللي أخدت منها الفيزا وإلا فيه احتمال بنسبة كبيرة هترجع تاني من المطار ومش هيسمحولك تكمل رحلتك.

المصدر: Schengen Visa Info