share this article

من أصعب الرحلات اللي طلعتها كانت اسكتلندا، لأني كنت طالعة منحة أربع أيام بس، وبعدين هيسيبوني في الفراغ الواسع اتصرف مع نفسي أو ارجع مصر من تاني، وعلى جثتي ده يحصل! 
قعدت أتفسح أسبوع بعد المؤتمر، بعدين اتطوعت كمزارعة في الريف الإنجليزي، تقدر تقرأ مغامرتي كلها من هنا.

أول ما وصلت هناك بعد ترانزيت ملوش معنى في "فرانكفورت"، مكنتش مركزة في حاجة غير إني بذاكر حاجات للمؤتمرالصحفى اللي المفروض رايحة أحضره وبحاول ألم أى معلومات عشان منظري وكده، أنا في الحقيقة كنت متوترة كأني أول مرة اسافر، وبدأت أتسحل في حاجات غريبة، زي إن السماعات بتاعتي فجأة بطلت تشتغل فقررت إني أفضل في المطار أصلح فيها، وأسأل طلاب المنحة اللي هم أصلاً ميعرفونيش إزاى أصلح سماعات الموبايل ولازم دلوقتي، حالًا! ركبنا الأتوبيس والأتوبيسات هناك غشيمة أوي في السواقة، اللي هو ركبنا وداخلين لسه بشنط سفرنا راح قفل باب الأتوبيس وساق بينا بسرعة، هوبااا راحت المشرفة بتاعتنا اتكعورت في الشنط ووقعت، والصراحة أنا ضحكت، معرفتش أمسك روحي، أعمل إيه طيب.

مصدر الصورة: Rough Guides

فضلت أشوف اسكتلندا من شباك الأتوبيس ومبسوطة طبعًا، لإني مش دافعة ولاحاجة من جيبي لحد دلوقتي، وشايفة خُضرة وناس جميلة ملونة، ومشرفة لبنانية كيوت بتحاول تساعدنا.

"إدنبرة" هى عاصمة اسكتلندا ودي مدينة تاريخية كلها بيوت قديمة وقصور ضخمة عريقة، حقيقي كإنك بتمشي في فيلم مش في الواقع، بس على الناحية التانية أهل البلد كانوا دائمي الشكوى؛ في إن بسبب المعمار القديم ده بيكون فيه مشاكل إنهم مثلًا يركبوا شبابيك جرار أو إنهم يصلحوا في السباكة، و الشركات الكبيرة والجامعات بتكون محافظة على الشكل الخارجي القديم ده، بس كإنه ماكيت لأنك أول ما بتخطي جوه المكان بتلاقي كل حاجة مودرن خالص، من بره كلاسيسكية ومن جوه محشية!

مصدر الصورة: Departures

وصلنا الدورمز Brae House أخيرًا، وهو متقسم لحاجة شبه شقق وفيها 6 أوض بحمامتهم المُنفصلة عن بعض، ومطبخ بكل أدواته مشترك، وده قريب من كل حاجة في إدنبرة بس هو غالي شوية، الليلة بـ40 إسترليني، بس مكنش فارق معايا لأن المنحة هى اللي بتدفع فلوسه.

أول يوم في المؤتمر كانوا بيرحبوا بينا وبيشوفوا محتاجين إيه وSpeech كده نتعرف فيه على الناس اللي هيدولنا المحاضرات الأيام اللي جاية، وبدأوا يعرفونا على الأكل الاسكتلندي الشعبي.

إليكم أهم وأحلى الأكلات، هى قليلة لأني مش من الناس اللي بتحب تجرب أكل جديد كتير بس حلوين.

الأكل:
Haggis 
المصدر:deadlinenews 

ده عبارة عن كرات لحمة كده كبيرة وبتكون معمولة سبايسي شوية وبيحطوها في عصاية شيش طاووق أو بيفتحوهالك في طبق، وفي منه للناس النباتيين بيتعملهم من معجون خضروات ويتحمر.

Fish and chips المصدر:Foodpanda

وده الطبق الشعبي بتاعهم، عبارة عن سمك فيليه مقلي وجمبه شرايح بطاطس، طعمه حلو أوي ورخيص، هتلاقيه في كل حتة، حتى البارات بتعمله.

Squashالمصدر:nutritiouslife

وده نوع من قرع العسل، وبيعملوه زى شوربة العدس كده وبيحطوا فيه رز أو يبشروا فيه جبنة.

بطاطس بقشرهاالمصدر:simplesweetsavory

بيقسموا البطاطس نصين من غير ما يقشروها ويدخلوها الفرن، بعدين يبشروا عليها جبنة وزبدة، بتكون حلوة أوي بس دسمة جدًا.

البقوليات المصدر:cheryllulientan

عندهم بقولويات شبه الفاصوليا بالظبط، ويقوموا واكلينها حاف كده كإنها سناكس أو على عيش توست، البتاعة اللي في الصورة اللي شبه السجق ده طعمه معجبنيش أبدًا.

scone  المصدر:odlums

الإنجليز دايمًا بيشربوا الشاي بتاعهم ما بين الساعة 4 لـ 5، وهو شبه الشاي اللي عندنا عادي، وبيكون جنبه فيه مخبوزات شبه الكيكة بس دسمة شوية و بتفتحه نصين وتحشيه زبدة أو مربى. 

الأكل في اسكتلندا لذيذ، بس ممكن أقترح عليكم شوية مطاعم حلال الأكل فيها حلو أوي لو انت مش بتحب تجرب أكل جديد زى حالاتي كده، وممكن كمان تستخدم أبليكشنز تدلك على اختيارات أكتر:

Taste of Italy: وده بيقدم أكل إيطالي، ترااا، مفاجئة مُبهرة، مش كده؟ لأ بس بجد أحلى حاجة عنده البيتزا والبرجر.
Ada : وده بيقدم أكل تركي حلو أوي، كل حاجة عنده جميلة وبيقدمها سخنة، بس لازم تحجز قبل ما تروح عشان بيكون عنده زحمة وممكن تفضل واقف في الطابور اللي بره المحل شوية، بيكون عندهم كمان حلويات شرقية.
Tornaj: ده أكل إيراني وهو محل واسع تحت الأرض، ومبيكونش زحمة أوي، بس الشوربة بتاعته سيئة، باقي الحاجات جميلة.
Cosmo: ده بيكون عبارة عن بوفيه مفتوح وفيه كل حاجة نفسك فيها، وممكن تخلص طبقك وتملاه تاني وتالت ورابع، أنا دخلت فيه وطلعت بعديها بـ3 ساعات وأنا أد الكون.
Hard Rock: أنا أكلت عنده ستيك كان حلو أوي بجد بس غالي شوية.
Mother India: الأكل حلو بس كمياته صغيرة وغالي.

المواصلاتالمصدر:energysavingtrus

متشلش هم المواصلات في اسكتلندا لأنها صغيرة أوي وتقدر تروح من مكان للتاني على رجلك، هناك مفيش مترو بس فيه أتوبيس حلو كده بدورين والمشوار لأي حتة ب 1.70 استرليني، بس هم بيقولوا على عملتهم pound وخلي دايماً معاك فكة عشان الماكينة اللي في الأتوبيس بتاخد الفلوس ومش بتطلعلك فكة، إدنبرة مثلا ممكن تلفها كلها في 7 أيام.

أماكن الفسح:

الأماكن المفتوحة اللي تقدر تزورها ببلاش:

بعد ما المؤتمر خلص واتطردت في الشارع ولا عاد فيه أكل ولا إقامة ببلاش، قولت لأ لازم اصحى وافوق لروحى وأشوف هعمل إيه في الرحلة دي.

Arthur’s seat:

أنا كنت بروح كل يوم البرلمان الأسكتلندى عشان المؤتمر، وبشوف جبل أخضر كبير وطويل أوي وقدامه بحيرة مياه عندها بط وشكلها مُريح بس مكنتش أعرف اسمه إيه الجبل ده، وبعدين ولد اسكتلندى قالي تعالى نروح Arthur -دا جبل هناك- وقولتله لأ أنا مش بحب أفلام الكارتون، هو قطع علاقته بيا طبعًا، بس أنا حقيقي جيه في عقلي فيلم كارتون أرثور لأني معرفش اسم الجبل ده إيه.

الوقت اللي هتحتاجه عشان تتسلق الجبل ساعتين، بس أنا قعدت أتسلق العمر كله، تحت الجبل في مكان مقفول وعليه قضبان حديد بينزل منه مياه باردة، وعندهم أسطورة بتقول إن البنات زمان كانوا بيستحموا في المياه دي لأنها بتخليهم أحلى ووشهم ينور كده.

أول يوم ليا بعد ما خلص المؤتمر مشونا من الدورمز الساعة 9 الصبح، وأنا كنت لسه نعسانة ومحجزتش أى حاجة، فأخدت شُنطي وحاجاتي وطلعت على Arthur أنام على البحيرة، المكان حواليها ياخد العقل ونضيف والهوا مُنعش و تلاقي أطفال وكلاب حلوين بيجروا في المكان، بس يعني شوية وهتزهق من صوت البط اللي في البحيرة والسقعة وتضطر تقوم تحجزلك أوضة في أى حتة.

Calton Hill:

هى عبارة عن ربوة طولها 103 متر، لطيف مش بطال، أو يمكن لأني طلعته بعد Arthur فمكنتش حاسة إنه أعظم حاجة، الطريق ممهد فمش مُتعب خالص في الطلوع، المنظر من فوق جميل تقدر تقعد في الجنينة اللي فوق شوية وتاكل وتفخد. 

Scott Monument :المصدر:Reddit

الخازوق الكلاسيكي، هو بجد شبه الخازوق بس مُبهر وأحلى كمان من الصورة.

قلعة إدنبرة:المصدر: شيرين نضال النعينش

عالم تاني مُبهر وهى مبنية فوق جبل عالي، فضلت شوية مصدقة في إنها ماكيت أصلًا لحد ما روحت لمستها عشان اتأكد إن دي حقيقة، جواها متحف بس بتذكرة غالية فطنشت أدخله بصراحة، القعلة ذات نفسها بتعمل جولات وأنشطة وعروض فنية جميلة أوي، في الحقيقة أنا مأسعفنيش الحظ إني اروح لأن مكنش فيه حجوزات وقتها، بس اتفرجت على العروض بتاعتهم على اليوتيوب وكنت أتمنى أروح.

قلعة ستيرلنج:  المصدر:roamingrequired

ودي بعيدة عن إدنبرة ساعة بالقطر بتاخده من محطة Waverly  بـ8 إسترليني رايح جى، هي أصلاً مدينة صغيرة أوي مفيهاش حاجات كتير أوي تتعمل بس جميلة خالص ومحندقة كده، في جولة بتتعمل جوة القلعة، بس أنا مبحبش الجولات دي فشوفت القلعة ومشيت.

قلعة Hailes:

بتاخدلها أتوبيس من إدنبرة رايح إتجاه East Linton، هى زي مبني أثرى مهجور و فيه فتحات ولفات كتير تحت الأرض، و فيه باب حديد على الأرض بيوصل لنفق وده كان السجن زمان ومتقفل بكذا ترباس، هناك مش هتلاقي سياح أبدًا لأنها منطقة ريفية.

لو عايز تنزل مياه:

المياه اللي في اسكتلندا مياه محيط فهى أوحش من مياه البحر، أقصد أقول إنك لو متصور إنك هتلاقي هناك بحر زى مصر ولا في حلاوته ونضافته فمش هتلاقي خالص، بس الشواطىء كلها مفتوحة لأى حد وببلاش.

شط ادنبرةPortobello: المصدر:Reddit

بيكون زى الكورنيش وعليه أكل وشرب بس المياه بتاعته مش حلوة خالص بس شكله حلو.

Dunbar-Belhaven:

هى بعيدة ساعة عن إدنبرة، بس كل شوية في أتوبيس بيوصل لهناك، الشط خلو بس مفيش خدمات عليه، ولا محل تشتري منه مياه حتى.

North Berwick:

بعيدة عن العاصمة بساعة ونص، وهى عبارة عن جبال كتير محاوطة المياه، بتفضل تتسلق شوية وبعدين تنزل على الشط، مفيش برضه خدمات عليه، بس هو مش بعيد عن البيوت حوالي 20 دقيقة مشي، متتحمسش أوى إنك تنزل المياه، لأنها برد أوى لدرجة إنك مش هتكون قادر تحرك أطرافك وحاجة عذاب، بس المنظر هايل وبتعرف تشوف كام جزيرة متمطوحين كده فى عرض المحيط.

شوبينج وتمشية:

تمشيات:

لأن إدنبرة صغيرة فـ أحلى حاجة فيها التمشية، وعلى طول الطريق هتلاقى حاجات كتيرة أوي حلوة، من البيوت لنضافة الشوارع والأماكن الخضرا الكتير وشجر في كل حتة وكراسي في النص تستريح عليها، التمشيات دي هتديك فرصة حقيقية إنك تعرف الشعب وطباعهم، هتلاقى نفسك بتشوف قد إيه الإسكتلنديين مُنفصلين بالأفكار والسياسة عن الإنجليز، وهتلاقى في الأزقة الصغيرة بين الطرق إحتجاجات مكتوبة على الحكومة البريطانية، هتشوف قد إيه هم مُهتمين بالعالم بره وبيحاولوا ميكونوش مُنعزلين وتسمع مشاكلهم اللي أغلبها بتتمحور في إن الرعاية الصحية مش قد كده.

في الطريق هتعرف حاجات صعب تشوفها لو منزلتش تتمشى على رجليك، ودي كانت حاجات مسلية بالنسبالي، زى إن عندهم مناطق كاملة مليانة أشجار ومدقوق عليها حاجة زى عملة معدنية مكتوب عليها تاريخ ميلاد الشجرة دي، ولأن الشجر بيكبر فـ ساعات تلاقى العملة مطبقة ودخل حتة منها في نسيج الخشب.

المقابر عندهم بتكون مفتوحة لأى حد يخش، وعلى كل قبر هتلاقى إهداءات مكتوبة للمتوفى من مامته أو باباه أوحبيبته، بتكون إهداءات غاية في الحزن والجمال، الصراحة أنا كنت بقضي وقت طويل هناك وكنت بزور مقابر في بريطانيا كلها مش اسكتلندا بس، وكل واحدة فيهم لها شكل مختلف شوية عن التانية من حيث الطراز المعماري ونوع التماثيل و طريقة كتابة الإهداءات.

في مرة وأنا بتمشى شُفت بيت له جنينة محندقة كده ومحطوط فيها ألعاب شكلها كيوت أوي، قربت شوية عشان اشوف إيه ده، لقيتهم حاطين حاجات قد تبدو عسولة بس هي في الحقيقة مُخيفة أوي، مرايات مقطوشة على وشوش عرايس لعبة مخلوعة من جسمها، تليفون أحمر كبير وعليه إيد مقطوعة بتطلب نمرة، جزمة حمرة بكعب عالي، بعدت شوية وأنا برفع عيني على البيت من فوق لقيت راس عروسة لعبة بتبصلي من الشباك، الموضوع كان مُخيف جدًا وقتها، بس مُسلي ومكنتش هشوفه أبدًا لو مكنتش بقطع كل يوم مسافات واسعة سيرًا على الأقدام.

لو رفعت راسك فوق وجبت آخر العماير القديمة هتشوف ديك منحوت بالحديد وعليه الإتجاهات شمال، جنوب، شرق، غرب، وده عشان زمان كانوا بيحددوا بيه اتجاه الرياح دي، وعلى فكرة في شبه الديك ده بالظبط كام واحد على كام فيلا قديمة في "الكوربة" -دي منطقة عندنا في مصر-.

Pentland:

لأني بحب الأماكن الخضرا الواسعة والخلا فقررت أروح هناك، المكان ده بعيد برضه عن إدنبرة بساعة، ومفيهوش سياح خالص هتلاقى بس أهل البلد أو رحلات للأطفال معمولة هناك، أنا رحت وكانت الدنيا بتمطر فكانت صعبة شوية بس لسه حلوة، الغريب إن هى ملهاش خريطة  مُحددة عشان تعرف تمشي فيها، بس هي عبارة عن غابة كبيرة أوي لها باب بتفتحه فبتلاقى ستاند قدامك بسيط عليه خريطة، بتمشي في دايرة واسعة أوي من الجبال الخضرا اللي بتتسلقها لبحيرات فيها ضفادع صغيرة ومش بتعرف تطلع برا الغابة دي غير لما بتخلص الدايرة الواسعة اللي بتتحرك فيها، أنا إتأخرت جوه لأني كنت بفضل مستخبية تحت شجرة لحد ما المطر يخلص، بعتقد إني لو كنت روحت ومعايا حد كنت هنبسط أكتر بكتير، خليني أوريكم إيه اللي بتشوفه طول طريقك في الغابة.

Hermitage of braid:

البيت ده هتلاقيه في الطريق، أنا مكنتش أعرف إنه ينفع ندخله فجربت أفتح الباب ولقيت مكتوب عليه لوحة من بره "متقتلش الضفادع والقنافد" إتوترت أوي بس دخلت، الأرض خشب باركيه بيئن تحت رجلي وممرات طويلة، وفي لوحات متعلق عليها صور حشرات ومش لاقية أى حد خالص جوه، مكنش فيه غيري. بعدين دخلت صالة تانية لقيت بنت صغيرة قاعدة بتلون على وشها، فالصراحة إتخضيت وأخدت بعضي ومشيت، بس بعدين قريت إن ده بيت أصحابه سابوه هدية للدولة عام 1937 وعملوه زي محمية طبيعية ومزار لأى حد يخش جواه.

Royal Observatory:
المصدر:doorsopendays

هتلاقى المبنى ده في طريقك وده زي مؤسسة للأبحاث الفضائية والفيزيائية الملكية، أنا معرفش هو مسموح للدخول ولا لأ بس أنا فضلت قاعدة تحته شوية.

Blackford hill:

منظر رائع من الخُضرا والجبال اللي مليانة زرع بس هو مُجهد شوية في طلوعه، ومن عليه تقدر تشوف Arthur في الناحية التانية، وبعد ما بتنزل من عليه بتلاقى البحيرة اللي فيها ضفادع وبط وبتلاقى الباب الحديد التاني اللي تقدر تخرج منه وتلحق أتوبيسك عشان ترجع إدنبرة من تاني. على فكرة في فنادق في Pentland لو حبيت تستريح ليلة هناك.

الشوبينج:
المصدر:3dreid

حاجة غريبة بس إدنبرة مفيهاش مول، عندها مبنى كده دور واحد وأغلبه محلات أكل، بس المحلات الأساسية والماركات كلها بطول شارع princess street  و saint Andrew تاخدهم مشى كده رايح جى، ولو تعبت في النص في محلات فاست فوود كتير مش غالية ممكن تريح فيها. أوحش حاجة بس إن المحلات كلها بتقفل على الساعة 7 قصة قصيرة حزينة، فيه هناك كمان محل إسمه pound land وده آخر العنقود فرع اسكتلندا الحبيبة، بيبيع كل حاجة وأى حاجة من أكل لشرب لمرطبات للجسم بـ 1 إسترليني، أرخص مكان تشتري منه لبسك بقى هو primark حلو أوي ورخيص خالص.

معلومات إثرائية أخى القارىء:

خلى معاك شنطة كبيرة أو كيس بلاستيك و‘نت بتعمل شوبينج، عشان هناك بيدولك الحاجة في إيدك كده ولو عايز شنطة بلاستيك بتدفع فلوسها، وخلي معاك زمزية مياه وتبقى تملاها كل شوية لما تعطش من أى مطعم، عشان توفر إنك تشترى إزازة كل شوية وهتحتاج تشرب كتير أكيد وأنت مدهول على عينك في الشوبينج.

المتاحف والجاليرهات:

مش محتاج حد يروح معاك، تقدر تنبسط أكتر وانت لوحدك، أو لو ناوي تروح مع حد يبقى تختار الشخص المناسب اللي هو على نفس درجة إهتمامك بالسياحة الثقافية، اسكتلندا مليانة متاحف بس دول اللي عرفت أزورهم وكلهم تذاكر دخولهم ببلاش لأى حد وفى واى فاى جوه كل واحد فيهم:

National Gallery of Scotland:
المصدر:EasyVoyage

أحكى إزاى بس على جماله، هو عبارة عن دورين مليانين لوحات زيت مرسومة على قماش وجواه كذا لوحة لـ "أفروديت" عمري ما شفت زيهم في أى حتة، وتمثال عبقري لـ "كليوباترا" بيحكي عن طريقة إنتحارها بالتعبان المسموم.

Scottish National Gallery:
المصدر:WikimediaCommons

بعيد عن إدنبرة بنص ساعة، موجود فيه كذا نوع من الرسم "التكعيبي و البورتريه والسريالي والمعاصر" وكنت مُتحمسة أوي لأنه في لوحات كتير لـ Rene Magritte، على الرغم إني مكنتش أعرف اسمه قبل ما اخش الجاليري بس كنت بتفرج على لوحاته من قبل كده، إحساس عظيم إن يكون عندك فرصة في العمر تقابل فيها الحاجات اللي بتحبها وجهًا لوجه.

National museum of Scotland: المصدر:MuseumIdeas

أنا رحته عشان لقيت كل زمايلي في المنحة بيروحوه، بس الحقيقة إنه ممل أوي وكان بنسبالي مش متحف أصلًا، متقسم صالات، صالة عارضين فيها اللبس الملكي وصالة عارضين فيها طيارات حربية، هم أول ناس صنعوها وحاجات كده على نفس المنوال، أظن إنها معجبتنيش لأن بنسبالي متاحف يعني آثار مش حاجة تانية، بس عادي يعني مش هتخسر لو روحت وشفت.

Writer’s Museum:المصدر: WelcometoScotland

وده متحف دورين والدخول ببلاش لأى حد، بس حقيقي لو معرفتش تخشه مش هيكون فاتك أى حاجة، هم بيعملوا ورش كتابية حلوة فلو قاعد مدة في اسكتلندا ممكن تحب تحضر ورشة من اللي بيتعملوا هناك.

Stirling Smith art gallery:المصدر:SmithArtGallery

لو ناوي تزور سترلينج فهى فيها جاليري وحيد وببلاش برضه ممكن تروح تتفقده، وفيه لبس أميرات حلو أوي للأطفال ممكن يلبسوه ويتصوروا بيه، أنا حاولت أحشر نفسي في واحده فيهم بس جه الأمن وطردني، زيارة مُوفقة يا شباب.

أكتر حاجات مُزعجة في اسكتلندا:

الحاجات اللي هقولها مش هتقدر تعمل إتجاهها أى حاجة غير إنك تكون مُتأهب نفسيًا في إنك هتقبلها وهتعيشها غصب عن حباب عنيك:

الحنفيات:المصدر: Retromixer

في اسكتلندا الحبيبة الحنفيات مفصولة الساقع عن السخن، يعني حنفية بتنزل مياه ساقعة أوي والتانية مياه مغلية، فمفيش حاجة وسط، وده يرجع إن المعمار عندهم قديم وأثري فهم مش قادرين يغيروا في نظام السباكة، بس هم مش مُهتمين بده ولا شايفنها مشكلة لأنها بتفكرهم دايمًا بماضيهم الحضاري العريق، بس بنسبالي أنا كشخص جاي في زيارة كان شيء مُزعج.

طيور النورس اللعينة:المصدر: TheCourier

واقفة في أمان الله باكل لقيت حاجة ضخمة بتقرب عليا بمنقار حاد وبصات شريرة ثاقبة و بطن منفوخة، أهشها مش ببتهش، أهلًا بك في أرض طيور النورس، شكلهم غير في مصر خالص وكبار أوي وبيطيروا على مسافات قريبة يعني ممكن وهى طايرة تخبط فيك بجناحها عادي ومُستعدة تاكل أى حاجة وتاكلك إنت شخصيًا لو مدتلهاش بالهداوة كل اللي في إيدك، المشكلة مش لحد هنا وخلاص، المشكلة في صوتهم، صوتهم مُزعج بشكل غريب، صوتهم شبه ستات بتصرخ، والساعة 4 الفجر بيحصل هياج ليهم غير مُبرر تلاقيهم واقفين فوق شباكك وبيرقعوا بالصوت، كرهت حياتي بسببهم.

النهار الطويل:مصدر الصورة: ScottishSunset

الشمس بتغرب الساعة 10 بليل، مكنتش حاسة إن الموضوع له تأثير دراماتيكي لأنه كنت بشوف إن النهار الطويل ده كويس عشان ألحق أعمل حاجات ياما في اليوم، بس الموضوع في أول أسبوع هيكون مُتعب جسديًا وهتحس بخمول شديد وتعب في العضم من غير سبب واضح غير إن جسمك لسه متعودش على التتغير الجديد ده.

الجو غدار:مصدر الصورة: Scotland

أدفى وقت تزور فيه إسكتلندا هو من شهر 6 لحد 7، وبرضه بيكون غير مُستقر وبتسقع أوي فجأة وتمطر برضه فجأة، أوحش حاجة إن بعد المطر بيطلع كده هوجة حشرات صغيرة تلزق في الجسم متعرفش بتيجي من فين ولاعايزة منك إيه.

إشارات المرور:مصدر الصورة: The Courier

بصراحة أنا مكنتش قادرة أفهم ليه الإشارة أفضل مستنياها ده كله تفتح، كانت بتتأخر أوي لدرجة إن في ناس من أهل البلد كانوا بيكسروها ويعدوا وخلاص، أنا ياما فاتتني أتوبيسات بسبب كمية الإشارات وقد إيه بتتأخر.

العُملة:
مصدر الصورة: Newssky

الفلوس هنا كل فترة صغيرة أوي بيغيروها، كنت في سوبر ماركت وبحاسب لقيت الست بتقولي العملة دي قديمة وأنا أقدر أسحب منك الفلوس دي كلها دلوقتي، فإضطريت أروح البنك أبدل كل الفلوس اللي معايا بالعملة الجديدة، ده كان مُزعج جدًا بالنسبالي لأني فضلت فترة من الزمن معييش فلوس كاش.

بتمنالكم سفرية جميلة موفقة، أظن كمان بلاش تضغطوا على نفسكم في الفُسح لو مش حاسيين إنكم قادرين تعملوا كده، يعني مش هيجرى حاجة لو زُرت متحفين من أصل 10 طالما إنت فقدت حماسك بشأن المتاحف، مفيش مشكلة.