share this article

كلنا عندنا الصاحب اللي كل ما ينزل صورة على النت تجيب كام ألف لايك وبيبقى طالع فيها آسر ياسين؟ تيجي إنت تنزل صورتك على انستجرام وتلعب في الفلاتر، مفيش فايدة هو حزلقوم. طب الموبايل نفس الموبايل، ومتصورين في نفس المكان، وصاحبك ماسافرش لبنان قريب، يبقى ايه بقى السحر والشعوذة دي؟
الموضوع ببساطة إن صاحبك بيستعمل أبليكشن يظبط بيه الصور قبل ما ينزلها. الأبليكشنز دي في منها كتير وفي سهل اوي تستعمله وفي محتاجين يوسف شاهين ييجي يشتغل بيه، بص احنا هنجيبلك الزتونة دول الأبليكشنز من مستوى الطالب المبتدئ لمستوى ويس أندرسون، لو الصورة طلعت وحشة بعد كده يبقى محتاج تسافر لبنان بعد كده يا معلم وتعمل آبجريد، مانا مش ساحر يعني.

KUJI CAM

الأبليكشن ده ينفع تصور بيه أو تجيب صورة من الصور اللي على موبايلك وتظبطها بيه، وهو بيظبط الصور لوحده ومفيهوش الشريط اللي تقعد تقلل وتزود الإضاءة والحاجات دي منه. أول مبتاخد الصورة هو بيحط عليها فلتر كده تحسه قديم وبيستعمل Light leak effects و Chromatic aberration. الأبليكشن فيه 3 اختيارات: Kuji style، Kodad Pro، و Vintage and Black & White. الأبليكشن بيزود فلاتر وتاريخ اليوم، و film dust، و3D effect.

من الأفضل متصورش بالأبليكشن، صور بالكاميرا العادية وافتح الصورة بالأبليكشن علشان ده هيديك اخيارات أكتر تجرب منها وهيطلعلك صورة أحلى وبجودة أعلى.

المستوى: سهل

Available forAndroid

 

TOUCH RETOUCH

ده بيخليك تشيل أي حاجة إنت مش عايزها في الصورة وتشيل أي بقع أو شوائب من الصورة، زي لو متصور وجنبك شجرة و عايز تشيلها مثلًا أو في بقعة على الكاميرا، وهكذا.

المستوى: سهل

Available foriOS and Android

VSCO

مصورين كتير بيفضلوا الأبليكشن ده، واللي بيفرق بينه وبين أبليكشنز كتير هو عدد الفلاتر المتنوعة اللي ممكن تحطها على الصورة. كل فلتر منهم مميز ويناسب أذواق كتير. لو دفعت فلوس وظبط حسابك هتاخد اختيارات أكتر بكتير تاخد منها.

المستوى: متوسط

Available foriOS and Android

 

SNAPSEED

Snapseed يعتبر واحد من أفضل أبليكشنز تظبيط الصور، علشان في حاجات كتير تقدر تظبط بيها الصورة، وكمان بيخليك تعرف تحسن الصورة من غير ما تبوظها. الأبليكشن ده مجاني ل IOS و Android ومش محتاج تشترك في حاجة علشان تاخد كل المميزات.

المستوى: متوسط

Available for:  iOS and Android

 

PIXLR

الأبليكشن ده بيديك شريط تقعد تظبط بيه قوة أو ضعف كل واحد من المؤثرات على الصورة، وفي زرار Fresh بيطلعلك أخر صورة خدتها. الأبليكشن فيه مميزات كتير زي collage اللي بيخليك تجمع كذا صورة في واحدة، و Splash اللي بيعمل حاجة حلوة في الصورة، بيخليها كلها أبيض وأسود و يسيب حاجة معينة تختارها  إنت تبقى ملونة.

المستوى: متوسط

Available for: iOS and Android

 

BIG LENS

الأبليكشن ده بيدي الإيفيكت اللي بيخليك تحس إنك قدام كاميرا بروفيشنال، وتبقى حمادة فوتوجرافي في نفسك، تأثير ال Depth of field بإنه بيركز على حاجة معينة في الصورة ويخليها In focus والباقي Out of focus (زي كاميرا DSLR).

المستوى: متوسط

Available for: iOS

 

LENS DISTORTIONS

اللي بيفرق الأبليكشن ده عن غيره هو إن كل الفلاتر والطبقات متاخدة من صور حقيقية، يعني لو عايز تأثير أكن الصورة ضبابية، التأثير بتاع الأبليكشن متاخد من صورة ضباب أو شبورة حقيقية، وهكذا.

المستوى: متوسط

Available for:  iOS and Android

SUPERIMPOSE

ده بيخليك تدمج كذا صورة مع بعض في صورة واحدة، أكن الصورتين بقوا صورة واحدة. الأبليكشن ده كمان بيخليك تعرف تعمل تصور مرتين وتركبهم فوق بعض، وتقدر تبدل أجزاء من  الصورة بصورة تانية خالص، وتخلط طبقات تانية في الصورة، وكمان تخفي  حاجات إنت مش عايزها في الصورة.

المستوى: متوسط

Available for:  iOS and Android

RNI FILMS

الأبليكشن ده بيعمل محاكاة من الأفلام لمصوري الموبايل، وبيعمل صور حلوة جدًا. الأبليكشن ده كمان سهل الاستعمال والفلاتر والمؤثرات بتاعته معموله من أفلام أنالوج حقيقية.

المستوى: متوسط

Available foriOS

LIGHTROOM

في الأصل Lightroom كان معمول للكمبيوتر، بس دلوقتي في منه نسخة موبايل بنفس القوة وتقدر تاخد الفلاتر بتاعتك من على الكمبيوتر وتبتدي تستعملها على الموبايل عادي. الأبليكشن ده مجاني بس لو دفعت اشتراك هتاخد مميزات زيادة.

المستوى: صعب

Available foriOS and Android 

Darkroom

اللي بيستعملوا الأبليكشن ده بيحبوه جدًا علشان بيديهم كل الأدوات اللي محتاجينها علشان يظبطوا الصور بتاعتهم زي ما عايزين بالظبط. ولو اشتركت في النسخة ال pro، الاحتمالات اللي ممكن تلعب بيها في الصور شبه مبتخلصش، في حاجات زي اللعب في الحجم، وقص الصور، والفلاتر، والإضاءة، وال Rotation، وال Saturation، و Vignette، والظل، وال RGB on a graph هتلاقي فيه الأسود، والظل، وال Midtones، و Highlights، وال White percentages في الصورة. ممكن برضه بسهولة ترجع للنسخ القديمة من الصورة قبل التعديل، وتعرف تعمل فلتر خاص بيك واللون بتاعه تظبطه هو وال Saturation وال Luminance. على الرغم من إن الكلام يبان معقد بس الأبليكشن ده معمول بطريقة مش معقدة وهتساعدك تفهم.

المستوى: صعب

Available foriOS