share this article

فيروز بتقول "هل فرشت العشب ليلًا وتلحفت الفضا، زاهدا فيما سيأتي ناسيا ما قد مضى" لو كنت من سعيدي الحظ اللي قدروا يشوفوا النجوم، من غير أضواء المدينة القبيحة، هتبقى فاهم جدا بنتكلم على إيه، الخيمة وال Sleeping bag، وممكن سماعات نشغل عليها مزيكا مناسبة للموقف، وتقدر تتوحد بعدها مع الطبيعة، زي أجدادنا اللي سكنوا الأرض دي من آلاف السنين، أما لو عمرك ما شفت النجوم بالمنظر ده قبل كده، فإنت عندك الميزة إنك تقدر تشوف ده لأول مرة، وتربط ده بمكان مميز أو شخص مميز، الفكرة إننا طول الوقت على بعد خطوات من الجنة اللي نقدر نلمسها بإيدينا، مش محتاجين بس غير نسيب المدنية ورانا ونروح للصحراء

احنا هنا هنقولك على أفضل أماكن الناس اللي بتحب النجوم وبتحب تصورهم بيروحلهم، خيمتك معاك شنطتك على ضهرك، مزيكتك في جيبك، حضر نفسك ويلا بينا.

مصر

  1. وادي الجمال

المصدر: رامي إبراهيم

الوادي ده تحفة مخفية مصريين كتير حتى عمرهم ما سمعوا عنه، في وادي الجمال هتلاقي الطبيعة في كذا صورة زي حتت صحراء وفيها شجر وأعشاب وهتلاقي حيوانات، كل ده وجنبك البحر الأحمر. المكان هادي جدًا وهتعرف تاخد صور واضحة للسماء والنجوم، وممكن تلاقي جمل معدي من جنبك عادي ويحلي لك الصورة أكتر.

  1. مرسى علم

    المصدر: رامي إبراهيم

    مرسى علم مكان تاني جميل على البحر الأحمر ومعروفة بشواطئها الرمل والشعاب المرجانية والمياة الصافية، ممكن كمان تصور مع شجر المنجروف بيبقى طالع وسط المياة (أيوة مياة البحر) وبيبقى شبه الأشجار اللي كانت في فيلم سيمبا الملك الأسد. بالليل اطلع من خيمتك وبص بس من السماء وهتلاقي لوحة للنجوم مرسومة في السماء.

  2. سيناء

    المصدر: رامي إبراهيم

    سيناء المكان اللي الناس اللي بيحبوا الطبيعة والهدوء بيروحوه، ممكن تبقى سايق عربيتك في أي حتة في جنوب سيناء وتركن على أي جنب بالليل وبنسبة كبيرة أوي هتلاقي منظر جميل للسماء والنجوم.

  3. دهب

    المصدر: رامي إبراهيم

    هتحتاج في دهب تبعد بس عن الممشى لإن كل ما كنت الإضاء أقل كل ما تشوف النجوم أفضل،  البلوهول وأبوجالوم والبلولاجون هتبقى الأماكن المناسبة جدا لده، ميزة دهب الأكبر في ناسها، الناس المختلفة عن بعض جدا لكن منسجمين في تناغم عظيم مع الطبيعة.

  4. نويبع

    المصدر: رامي إبراهيم

    نويبع في الأصل ميناء بتجيلها بيربط مصر بالأردن بالسعودية، لكن موجود هناك كامبات برضه وفنادق، تقدر تشوف منها السماء الصافية وتصور النجوم وتتأمل براحتك.

  5. راس شيطان

    المصدر: رامي إبراهيم

    رأس شيطان جزء من نويبع عبارة عن كامبات كتير بطول الطريق ع البحر، أقرب للي بيحبوا يرجعوا للطبيعة، يناموا على مراتب ع الأرض، وعشش ع البحر، والحد الأدنى من المدنية في مقابل الحد الأقصى من الطبيعة.

  6. شرم الشيخ

    المصدر: رامي إبراهيم

    مش هتلاقي كامبات كتير في شرم الشيخ – برضه جزء من سيناء - بس لو عايز عيشة أفخم شوية، ممكن تقعد في فندق في شرم وتستمتع برضه بالسماء الجميلة اللي هي عامل مشترك في سيناء كلها.

  7. وادي الريان

    المصدر: رامي إبراهيم

    وادي الريان في الفيوم وده عبارة عن محمية طبيعية فيها شلال جميل ومنظر سماء تحفة بالليل.

  8. الصحراء البيضاء

    المصدر: رامي إبراهيم

    المحمية الطبيعية دي في واحة الفرافرة وبتجذب ناس كتير بسبب الصخور البيضاء اللي فيها. الصحراء البيضاء مناسبة جدًا للتخييم وهتلاقي فيها منظر النجوم والسماء من أجمل ما يكون.

  9. واحة سيوة

    المصدر: رامي إبراهيم

    سيوة واحدة على الرغم من بعدها عن القاهرة، وإنها شبه محدوفة في الصحراء بالقرب من حدود ليبيا، لكن مع ذلك بتشد سياح كتير بسبب ثقافتها المميزة وناسها والمناظر الطبيعية اللي هناك. لو عايز تعمل كامبينج في مكان مميز ومفيش حواليك غير السماء والنجوم، روح سيوة.

  10. أسوان

    المصدر: رامي إبراهيم

    أجمل ميزة في أسوان من ناحية تصوير النجوم هو إن ده تقريبا المكان الوحيد في مصر اللي تقدر تصور النجوم فيه مع النيل، مش محتاج أي أسباب تخليك تحبها أكتر من إنها بلاد الدهب.

الإمارات

  1. دبي

    المصدر: نوبيرول إسلام

    دبي من أحلى المدن اللي ممكن تروحها في الشرق الأوسط، بس جربت تبعد عن صخب المدينة وتاخد جنب وتشوف المدينة والسماء بالليل؟ لو عملت كده هتلاقي مباني ضخمة بتلمع تحت ضوء النجوم في مشهد تحسه سينمائي.

  2. الربع الخالي

    المصدر: توماس لاوليس

    دي واحدة من أكبر الصحراوات في العالم ومكان مثالي تروح تخيم وتستمتع بهدوء الصحراء وجمال النجوم بالليل في العراء.

  3. رأس الخيمة

    المصدر: ناتاشا هاجارد

    رأس الخيمة معروفة بشواطئها على الخليج، ومن أحلى الأماكن اللي ممكن تصور منها السماء بالليل. ممكن تطلع بره المدينة لأي واحدة من الجزر اللي في رأس الخيمة وتستمتع بالمنظر.

  4. أبو ظبي

    المصدر: AkalFalahi

    عاصمة الإمارات ومركز سياحة عالمي، أبو ظبي بتبقى كلها منورة بالليل تحت ضوء النجوم. لو بتدور على تجربة هادئة تحت ضوء القمر، ممكن تاخد عربيتك وتطلع بره المدينة لأي حتة صحراء.

  5. مليحة

    المصدر: Prabhakaran A

    مليحة موجودة في الشارقة وتحسها جزء من صحراء كده، وده معناه إن بالليل منظر السماء والنجوم جميل ودي مهرب لطيف من وجع دماغ البلد.

السعودية

  1.   المنطقة الشرقية
     

    المصدر: نواف الملهم
      
     دي أكبر منطقة في السعودية وفيها حدائق كتير، وبتطل على الخليج الفارسي. المنطقة الشرقية جميلة بالليل ومنظر السماء فيها يشدك معاه. ممكن تاخد عربيتك في أي وقت وتطلع على أي حديقة من الموجودين وتستمتع بليلة هادئة تحت النجوم.

  2.    فوهة الوعبة

    المصدر: خالد فاروق
      
    دي حفرة ناتجة عن بركان في السعودية وبتاخد حوالي ساعة على ما تنزل لقاع الحفرة، بس متخيل منظرالسماء في الصحراء ومفيش حولك حاجة وأنت تحت النجوم بس؟

  3.   القيصومة

    المصدر: حسين الملهم
      
     القرية السعودية دي معروفة إن جوّها شديد، حر جدًا في الصيف وبتوصل لدرجة التجمد في الشتاء. ممكن تاخد الكاميرا بتاعتك وتاخد صورة لمنظر السماء الجميل فوقك في ليلة صافية، لو عرفت تلاقي الليلة دي.

لبنان

  1. بيت الشاعر

    المصدر: Ace Shooting

    دي قرية في لبنان ممكن دايمًا تهرب من دوشة البلد ليها وفيها منظر سماء جميل جدًا.

  2. وادي لقلوق

    المصدر: كريم بو كريم

    دي منطقة جبلية في جبيل وأعلى من سطح البحر بحوالي 1800 متر وده مديها منظر سماء ملوش مثيل وكمان هتلاقي حولك سلاسل جبال حول الوادي نفسه.

  3. Cedars Ground Campsite

    المصدر: جهاد أسمر

    زي ما واضح من الاسم، دي منطقة تخييم وسط غابات وحولك أشجار، المنظر من هناك من أحلى ما يكون وإنت نايم في قلب الطبيعة بالليل تحت النجوم.

عمان

  1. صمد

    المصدر: سيف الحارثي

    صمد موقع أثري في عمان تقدر تزوره بالليل وتشوف جمال السماء فيه والنجوم.

المغرب

  1. عين العودة

    المصدر: Saad Ouache

    دي مدينة في المغرب وعدد سكانها قليل ومناظرها الطبيعية روعة. بالليل المدينة الصغيرة دي ممكن تشوف فيها السماء صافية والجبال المحيطة كمان.

  2. الصحراء الكبرى

    المصدر: Lucie Debelkova

    دي واحدة من أكبر 3 صحراوات في العالم، وبتبقى حر جدًا في الصبح بس بالليل بتلاقي منظر صافي للسماء طبعًا. ممكن تاخد عربيتك وتطلع لأي حتة فيها تتفرج على النجوم وتقضى ليلة هادئة، بس خد بالك متروحش من غير مرشد.

  3. قصر آيت بن حدو

    المصدر: Lucie Debelkova

    القصر عبارة عن مجموعة مباني محاطة بحوائط عالية في منظر تقليدي للمساكن الصحراوية. منظر القصر تحت ضوء القمر هتفتكره لفترة طويلة .

  4. جبال الأطلس الكبير

    المصدر: Lucie Debelkova

    سلسلة الجبال دي في وسط المغرب ودي لوحدها منظر طبيعي جبار وتحت ضوء النجوم المنظر بيبقى أحلى كمان.

تونس

  1. جربة

    المصدر: Mehdi Mokadmi

    دي جزيرة بعد ساحل تونس، ومشهورة جدًا بشواطئها ومدنها الصحراوية اللي تقدر فيها تشوف السماء والنجوم على البحر أو في المدينة – اللي هيبقى فيها منظر جميل برضه عشان صحراء.

    ممكن تتفرج عليهم فيديو بمزيكا زياد الرحباني، بننصحك تقفل الأنوار وتستمتع بالمشهد والموسيقى