share this article

يقولك سافرت باريس؟ آه، جربت أكلها؟ لاء، يبقى ما سافرتهاش، حاول متبقاش الشخص اللي لما يسافروا باريس أو طوكيو أو نيروبي بيقضوا الرحلة كلها في ماكدونالدز. ازاي هتستمتع بتجربة السفر بجد لو مكلتش الأكل اللي أهل البلد بياكلوه؟ الموضوع ده بيبقى أصعب لما تكون بتدور على أكل حلال في بلد ماتعرفش فيها حاجة، بس في أبليكشنز لده؟ ورقة وقلم واكتبي معايا يا ست الكل.

Haloodie

الأبليكشن ده بسيط ولطيف، بتدخل موقعك وبيطلعلك قائمة فيها أقرب مطاعم حلال. زي Yelp! الأبليكشن ده بيوريك اقتراحات المطاعم في هيئة قائمة أو عن طريق خريطة جوجل تفاعلية. صفحة فايسبوك بتاعت Haloodie برضه شغالة دايمًا وبتقدم تقييمات وترشيحات لمطاعم في أمريكا وأوروبا.

Halal Dining Club

دور على مكان أو نوع الأكل مع Halal Dining Club وهتكتشف إذا كان المطعم حلال ولا لأ، وإذا كان المالك مسلم، وإذا كان بيقدم كحول ولا لأ وكمان إذا كان ميال للأسماك والأكل النباتي. الأبليكشن ده بيغطي المدن الكبرى في المملكة المتحدة وشوية مدن كبيرة في شمال أمريكا وسنغافورة وممكن تستعمله عشان تعمل حجز في مطعم حلال من اختيارك. والأبليكشن ده بيقدم خدمة تفاعلية عن طريق نقط للمستخدمين اللي بيسجلوا أو يحجزوا أو يعملوا تقييم لمطعم عن طريق الأبليكشن، النقط دي ممكن تستخدم في التبرع لجمعيات خيرية من خلال التطبيق نفسه.

Halal Trip

متوفر بالعربي، وإنجليزي، وتركي، الأبليكشن ده مش بيغطي بس الأكل الحلال، بيدي كمان حاجات كتير من أول اتجاه القبلة وأدعية السفر لحد المطاعم الحلال والجوامع حولك. تقدر تدور حولك على مطاعم حلال أو أطباق حلال في مطاعم عادية. الأبليكشن كمان بيوفر رحلات فيها أكل حلال لأماكن حول العالم.

Zabihah

 Zabihah بيغطي العالم كله وبيوريك المطاعم والمحلات الحلال حولك، وممكن تدور بالوجهة وتجهز لرحلتك قبل ما تسافر. المستخدمون كمان يقدروا يدوا تقييمات للمطاعم ويدوروا على مساجد على الأبليكشن ده، اللي هو واحد من أقدم أبليكشنز الأكل الحلال.

Meembar

الأبليكشن ده بيركز على تجربة السفر الحلال فيما يتعلق بالمطاعم والفنادق والمساجد، وبيجمع بياناته من الهيئات اللي بتدي شهادة الحلال وكمان من توصيات المستخدمين. Meembar كمان بيسمحلك تقترح مطاعم وتدي تقييمات، وتكتب مراجعات عن المطاعم عشان تفيد غيرك.

Irhal

متوفر بالعربي والإنجليزي، Irhal عنده محتوى شامل عن وجهات محددة، وبيركز على الأكل الحلال والمساجد والفنادق الحلال. ممكن تدور حولك تاكل فين، وتبات فين، وتصلي فين.

Crave Halal

يقال إن الناس دول بيكلموا كل مطعم على الأبليكشن – في كندا وأمريكا- عشان يتأكدوا إنهم واخدين شهادة الحلال.

Hal’Rezo

ساعات بعد يوم فرهضة واستكشاف في بلد بتبقى عايز تجيب ديليفري لحد باب بيتك من غير ما تضطر تقلق البرجر اللي هتاكله حلال ولا لأ. Hal’Rezo – متوفر بالعربي والإنجليزي والفرنسي والهولندي والإسباني – مش بس بيعلم على المطاعم الحلال القريبة، ده كمان بيخليك تطلب أكل حلال لحد باب بيتك.

Halal-Navi

ده ينفع لأي وجهة آسيوية، وبيشمل مطاعم ومساجد، وفنادق حلال. الأبليكشن ده جديد نسبيًا وقاعدة البيانات بتاعته مبنيه على المستخدمين، بس حاليًا هيساعدك تدور على الحاجات الحلال في آسيا.

Halal Gourmet Japan

ده محدد أكتر شوية من الباقي وبيساعدك تلاقي اختيارات حلال وإنت في اليابان، هتختار بس مكانك ونوع الأكل اللي عايز تاكله، وبيديك كمان اختيار إنك تدور تحت ظروف معينة، زي تدور على لحم حلال، واختيارات نباتية وتتبيلات حلال، ووجود الكحول من عدمه، ومكان الصلاة، وحاجات تانية كتير.