share this article

مفيش حاجة أسخف من إنك تبقى جعان في بلد أجنبي ومش عارف تعمل ايه. ساعات كده لغة الإشارة مبتبقاش مفهومة وممكن تقعد نص ساعة بتشاور لواحد هندي في الشارع في مومباي إنك جعان وعايز تروح تاكل وهو مش فاهم منك أي حاجة واليفط اللي في الشارع قدامك زيها زي الهيروغليفي بالظبط. طب والحل؟ أكيد مش هتتعلم لغة كل بلد تسافرها قبل السفر، ماكنش حد غُلُب، طبعًا في زمن في أبليكشنز لكل حاجة، في مجموعة أبليكشنز هتحل لك أزمة اللغة دي بدل ما تموت من الجوع في بلد أجنبي.

iTranslate

ده أبليكشن موجود على IOS  وAndroid، وبيديك فرصة إنك تقرأ وتتكلم وتكتب بأكتر من 100 لغة. تقدر تترجم موقع أوتتكلم مع حد أو تدور على كلمات ومعاني، كل ده عن طريق الأبليكشن. ممكن تتكلم عربي مثلًا والأبليكشن هياخد الكلام ويترجمه لللغة اللي إنت عايزها، وتقدر كمان تستعمل كاميرا الموبيل وتاخد صورة أي كلام وتترجمه، زي يافطة في الطريق أو منيو مطعم. وينفع كمان تترجم حاجات معينة وإنت أوفلاين من غير إنترنت، عشان متدفعش دم قلبك في التجوال.

Google Translate

مفيش حد ميعرفش Google، العظيم في أبليكشن الترجمة بتاعهم إنه سهل الإستعمال جدًا وفي سهولة إنك تدور على حاجة على جوجل نفسه عادي. الأبليكشن ده بيديك شوية اختيارات مفيدة جدًا. ممكن تصور يافطة أو أي حاجة وهو هيترجمها علطول، ممكن تنزل الجُمل المشهورة في أي لغة عشان لو معكش إنترنت. مش كده وبس، كتير من اللغات اللي موجودة على الأبليكشن ممكن تترجم من غير إنترنت أصلًا، وده هيساعد لو حبيت تعمل مُغامر وتروح كامبينج في غابة ولا حاجة. الأبليكشن ده موجود على أي نظام تشغيل تقريبًا.

TripLingo

ده معمول للناس اللي بتسافر كتير، وفيه أوبشنز زي مُترجم لحظي للصوت، وقائمة بالجمل الرسمية، والعادية، والعامية فيها أكتر من 2000 جملة لكل لغة، و كمان نصائح عن ثقافة ولغة كذا بلد. ومتاح ليك إنك تعمل مكالمات دولية عن طريق الأبليكشن عن طريق الواي فاي، وحاجات تانية كتير. الأبليكشن ده من أحسن الموجودين وفيه معلومات كتير مفيدة وهينفعك لو إنت في بلد أجنبي، ومتاح لل IOS  وAndroid.

SayHi Translate

الأبليكشن ده بيديك ميزة إنك تختار من كذا لهجة مختلفة للغات، وده مفيد جدًا لينا كعرب بما إن كل بلد تقريبًا ليها لهجة. الأبليكشن ده كمان بيخليك تتكلم بدون مقاطعة، كل اللي هتعمله هو إنك هتدوس زرار وتبدأ تتكلم وهو هيترجملك، وفي اختيار بين صوت راجل أو ست عشان لو زهقت من صوت SIRI. وممكن كمان تبطّأ الترجمة عشان لو عايز تفهم وتسمع جزء معين كويس. SayHi Translate متاح لل IOS  وAndroid.

iHandy Translator

ده أبليكشن معمول للأيفون ومن أفضل الأبليكشنز الخاصة بالترجمة ليه، مع إنه بيترجم كلام مكتوب بس. في أكتر من 50 لغة تترجم ليها ومنها والتفاعل مع الأبليكشن سهل، وبيديك اختيارات زي إنك تشوف الجمل المترجمة قبل كده من غير ما تضطر تكتبها تاني، وبيديك كمان قائمة بجُمل مشهورة في اللغات الموجودة، واختيارات تانية كتير.

Speak & Translate

ده كمان تطبيق للأيفون وبيديك حرية الاختيار ما بين أكتر من 100 لغة تترجم ما بينها الجُمل، وفوق ال50 لغة للترجمة الصوتية. الأبليكشن ده مدعوم من Apple Speech Recognition Technology وده بيخلي الترجمة أسرع.

Takeasy

تخيل لو محفظتك اتسرقت في بلد ما واحتجت تقدم تقرير شرطة، مفيش داعي تجرب قفا الحكومة في دولة أجنبية عشان حاولت تشرحلهم مشكلتك بالإشارة في نص ساعة، أو قعدت تتخانق مع الموبايل عشان يترجملك وفي الأخر جبت سيرة الحاجة والدة الظابط وإنت مش واخد بالك. الأبليكشن ده - متاح لل IOS  وAndroid – بيديك جنب خدمات الترجمة الطبيعية حاجة مفيدة جدًا، بيخليك تكلم مُترجم فوري – كأنه المترجم الخاص بتاعك. ببساطة هتختار اللغة بتاعتك واللغة اللي عايز تترجم ليها والأبليكشن هيوصلك بالمترجم، بعد كده هتكلمه وهو هيحل لك مشكلة اللغة.

Reverso Translation Dictionary

طب لو إنت في رحلة شغل واحتجت تقعد تقول كلام مجعلص وكبير خاص بالشغل هتعمل ايه؟ Reverso متخصص في الكلمات اللي ليها استعمال معين وفيه قاعدة بيانات ضخمة مليانة أمثلة من الواقع، وفيه كمان محرك بحث لغوي قوي بيديك فرصة إنك تدور على كلمات وجمل مستعملة في أي حاجة زي الأفلام والتقارير الصحفية وحاجات تانية كتير. الأبليكشن موجود على IOS  وAndroid.

Forvo Pronunciation Guide

مهم إنك تبقى عارف تقول ايه، بس ده نُص المطلوب، النُص التاني إنك تعرف تنطق الكلام من غير ما اللي قدامك يتنح علشان مش فاهم الكلمة. الأبليكشن ده فيه أكتر من 3.5 مليون نطق لأكتر من 340 لغة من ناس دي لغتهم الأصلية. الأبليكشن موجود على IOS  وAndroid.

 دلوقتي إنت هتعرف تتصرف مع أي لغة تقريبًا، هتروح فين بقى؟

ملاحظة: معظم التطبيقات دي ببلاش بس فيهم اختيار إنك تدفع اشتراك وتاخد مميزات واختيارات أكتر.