share this article

تجهيز الشنطة مش ألطف حاجة في الدنيا، في ناس بتكرهه لدرجة إنهم بيخلوه لآخر لحظة قبل السفر على طول؛ ودي نهايتها بتبقى معروفه ووحشة، بس الأكيد إنه لو الشنطة اتجهزت صح، ده هيخلي رحلتك أسهل بكتير، الموضوع ممكن يبان صعب بس الحقيقة هي مهارة بتاخد وقت وبيتقنها الناس اللي بتسافر كتير، كل الموضوع شوية عوامل بس تاخدها في اعتبارك زي الجو عامل ايه؛ لعدد الأيام اللي هتقضيها، ووسيلة المواصلات اللي هتاخدها – لو طيارة مثلًا هتسأل اسئلة زي هل فيه حد أقصى للوزن؟ هل الشنط في أمان؟ - لازم تاخد كل الحاجات دي في الإعتبار عشان تتفادى أي مفاجئات في رحلتك .. دي شوية نصائح عن إزاي تجهز شنطتك وإيه التفاصيل اللي تاخد بالك منها عشان تسافر سفرية خفيفة لطيفة ظريفة.

1- Checklist المصدر: Favoritestory

ليستة باللي هتاخده قبل ما تسافر، كتابتك لكل حاجة هتحتاج تاخدها وإنك تاخد وقتك وإنت بتجهز الشنطة هيوفروا عليك كتير وهينظمولك الدنيا، الأيام دي كل حاجة بتتعمل على الموبايل فا ليه متعملش القائمة دي على موبايلك علشان تعرف تراجع عليها أول ما تخلص وقبل ما تتحرك، أنا شخصياً بحب Google Keep شكلها حلو ومنظم وفيها ألوان وتقدر تشطب على كل اللي خلص عشان متتلخبطش وتفضل تراجع كل شوية، غير كمان فيه صور جاهزة هتلاقيها على موقع Pinterest بالأساسيات اللي ممكن تحتاجها في أي سفرية ممكن تطبعهم على الجاهز وتزود عليهم الحاجات الخاصة بيك.

2- مصيف ولا مشتى؟ المصدر: Today Show

أكيد لازم تبقى عامل حسابك على التفاصيل اللي بتفرق على حسب إنت مسافر مكان فيه صيف ولا شتا، يعني متنساش تاخد حاجة مهمة زي واقي الشمس والمايوه لو رايح حتة استوائية مثلًا، ونفس الكلام لو مسافر حتة شتوية، هتحتاج تاخد طبقات لبس كتير، وممكن برضه تلبس أتقل لبس عندك على الطيارة عشان تخف من الشنطة وتفضي مكان للأساسيات، وأوقات هتحتاج تاخد معاك جاكيت أو حاجة تقيلة حتى لو رايح مكان فيه صيف في حالة مثلاُ لو بالليل بيبقى برد؛ ودي حاجة لازم تكون عامل حسابك عليها بعد ما تشوف حالة الطقس التفصيلية للمكان اللي إنت رايحله.

3- لا لتطبيق الهدوم! المصدر: timesofoman

فيه طرق كتير ممكن تجهز الشنطة بيها، بس أكتر طريقة فعالة فيهم هي اللف – تلف اللبس على هيئة لفات صغيرة علشان يشغل مساحة أقل من الطبيعي لو طبقته عادي، لو لفيتهم بالطريقة دي وحطيت لفة لفة هتعرف تستغل كل شبر من الشنطة، غير كمان إن الطريقة دي هتحافظ على شكل اللبس وتخلي الكرمشة أقل بكتير.

شوف الفيديو ده عشان تعرف إزاي تلف الهدوم في الشنطة.

4- النظام حلو المصدر: Caroline Rector

فيه بنات بتحب تغيّر الطقم بتاعها 3 مرات في اليوم؛ مسافرين بقى وعايزين نتصور ونحط صور على انستجرام، وفيه ولاد بيحبوا "يعبّوا" الشنطة حرفياً بكل حاجة على رف الدولاب عشان هو مالوش دماغ بقى يقعد ويرتب، لو مش هيكون عندكم مشكلة مع الوزن الزيادة ولخمة الشنط يبقى تمام عيش حياتك، بس سهل جداً جداً تسافر خفيف لو ظبطت الأطقم اللي هتلبسها على عدد الأيام بتاعة السفرية، وسهل أوي إن قطعة ملابس واحدة تتلبس كذا مرة وبكذا طريقة، وكده تتجنب إنك تاخد هدوم بزيادة وتلاقي نفسك في الآخر فيه حاجات كتير واخدة مساحة وملبستهاش.

شوف الفيديو ده عشان تعرف إزاي ممكن تستغل كل حاجة معاك لو وضبت شنطتك صح من الأول.

5- اختيار الشنطة المصدر: Consumerreports

الشنطة المناسبة هتساعدك تقلل أي وزن إضافي وهتخلي حركتك أسهل، خلّي معاك شنطة خفيفة carry-on ومعاها شنطة ظهر/شنطة ايد؛ تقدر تطلع بيها الطيارة على طول من غير وزن وجمارك، وهتوفر الوقت اللي بتفضل متذنب فيه جنب سير الشنط مستني شنطتك تظهر عشان تاخدها وتمشي، ويا سلام بقى لو فيه ترانزيت أو تأخير أو شنط موصلتش، كل المشاكل دي سهل تبعد عنها لو لمّيت الليلة.

تقدر تستعين بالفيديو ده عشان تاخد شوية أفكار قبل ما تنزل تشتري شنطة سفر جديدة.

6- للمصورين المصدر: Jakob Owens

لما تجهز عدة (عدة تصوير مثلًا) لازم تدرس المكان اللي هتروحه عشان تعرف هتحتاج ايه، ممكن بعد كده تاخد عدسة أو اتنين وتسيب أي حاجة حاسس إنك مش هتستعملها كتير، بدل ما تاخد كل عدة االتصوير وظهرك يوجعك من شيل الحاجة دي كلها، شنط الكاميرات الصغيرة بتساعد تاخد معاك مستلزمات الكاميرا والشواحن وكل ده في مساحة صغيرة، عشان كده مهم إنك تختار العدة المناسبة لرحلتك – متاخدش الكاميرا التقيلة، خد الأصغر، هتؤدي الغرض، كمان الكاميرات الغير عاكسة متوفرة دلوقتي وفيها اختيارات كتير لكل نوع تصوير، ودي حجمها بيبقى نص حجم الكاميرا الـDSLR العادية ومع الحفاظ على الجودة، نفس الكلام للترايبود، سيب الكبير التقيل وخد الخفيف اللي غالبًا هيغطي احتياجك.

7- شنطة جوة شنطة جوة شنطة المصدر: blessthisstuff

فيه افتكاسة ممكن تعملها وهتساعدك هي إنك تلم مجموعة حاجات في شنط أصغر وترتبهم في شنطتك الكبيرة أو شنطة الظهر الخفيفة، ده بيخلي أسهل بكتير إنك تلاقي الحاجة وميبقاش فيه لغبطة بين الحاجات، برضه الأكياس البلاستيك سهلة الفتح ممكن تشيل فيها الشواحن والأسلاك أو الشامبو والسوائل مثلًا، وممكن برضه تخلي معاك شنطة صغيرة تحط فيها أساسيات السفر زي الباسبور والفلوس والسماعات ودي هتبقى معاك على الكرسي وشنطة الظهر فوق في المقصورة.

نصائح صغيرة عالماشي:

- لو معاك كذا جزمة؛ ممكن تحط الشرابات جوة الجزم عشان تحافظ على شكل الحزمة وكمان تعرف تلاقي الشراب بسهولة.
- خد معاك أكياس بلاستيك زيادة عشان طول السفرية هتحتاج تفصل الهدوم النضيفة عن الهدوم اللي مش نضيفة.
- كل حتة دلوقتي فيها العلب والأزايز البلاستيك الصغيرة بتاعة الشامبو والشاور جل والكريمات وللماكياج والرفانات، وأصلاً فيه ماركات كتير بقت تعمل أحجام مخصوص للسفر Travel size.
- ممكن لو معاك هدوم سهل غسلها على الإيد تبقى تغسلها وإنت مسافر وبكده توفر مكان في الشنطة لحاجات تانية، كمان فيه دول كتير بيبقى فيها مغاسل جنب الفنادق والهوستلز وبأسعار حلوة جداً.
- متنساش تاخد معاك شنطة إسعافات أولية صغيرة للطوارىء فيها أساسيات للجروح مثلاً أو الصداع أو وجع البطن؛ دوا للحموضة.
- ممكن تخلي معاك شنطة صغيرة برضه فيها خيط وإبرة ودبابيس عشان لو هدومك حصل فيها أي حاجة.
- في الآخر طبعاً لازم يبقى معاك قفل صغير يا إما للشنطة أو للدرج أو الدولاب اللي هتحط شنطتك فيه تحديداً لو نازل في هوستل مثلاً.