share this article

الموضوع ده اتنشر أول مرة على مشروع سفر، ويعاد نشره في Safareya بالإتفاق مع إدارة الويب سايت.

أغلبنا بعد ما بنلاقي تذكرة الطيران المثالية لينا من حيث السعر والمعاد، بننسى حاجة مهمة وهي اختيار الكرسي اللي هنقعد عليه في الطيارة. احنا في 2019، فمعظم إن ماكنش كل شركات الطيران بتوفر لعملائها بعد حجزهم للتذكرة إمكانية انهم يختاروا الكرسي بتاعهم، بدل ما يعتمدوا على موظف الشركة اللي بيشوف حجز الطيارة في المطار، وبيسئلك بس إذا كنت عايز كرسي جنب الشباك ولا في النص ولا جنب الممر. الفكرة أن سواء كرسي جنب الشباك أو في النص، فيه أكتر من حاجة تانية بتفرق في قد إيه الكرسي ده هيريحك ولا لأ.
في 6 أفكار المفروض ييجوا على بالك بعد ما بتحجز التذكرة، وهيساعدوك تختار أكتر كرسي مناسب على الطيارة.

1- موقع Seatexpert

في 2002، راجل اسمه Huey Lee كان بيسافر كتير جداً وكل مرة بيقعد في أي كرسي وخلاص. هو لاحظ إن فيه كراسي أحسن من التانية، فدور على موقع بيقدم خرائط تفصيلية لترتيب الكراسي في الطيارة لكن ما لقاش. قرر بعدها إنه يعمل موقع Seatexpert.com ويقدم فيه للمُسافرين خرائط الكراسي في الطيارات، عشان يساعد المُسافرين على الإختيار. الموقع بيساعدك على إنك تعرف الكراسي الكويسة والمتوسطة والوحشة في كل طيارة تابعة لكل الخطوط الجوية. الكراسي اللي لونها أحمر هي الأسوأ، والأخضر هي الأفضل، تحديد مستوى الكراسي اعتمد على تجميع آراء مُسافرين كتير حول العالم. موقع Seatguru بيقدم نفس الخدمة برضه.

2- اختار الكرسي اللي بيديك مساحة تفرد رجلكمصدر الصورة:Shutterstock
المساحة دي اسمها legroom، وهي المسافة اللي تقدر تفرد فيها رجلك. حاجة زي دي بالنسبة لشخص طويل شىء أساسي يهتم بيه. في طيارات مثلاً بتكبّر المساحة ديه في أول كراسي في الطيارة القريبة من باب الخروج، بما إن مفيش كراسي تانية قدامها.

3- اختار المكان البعيد عن الحمام

هتحس بمدى سوء المكان القريب من الحمام في الرحلات الطويلة، بالذات لو حجزت كرسي قريب من الحمام وجنب الممر. ما تحاولش تعد الناس اللي هتخبط فيك وهما رايحين راجعين.

4- بلاش الكرسي اللي في الآخر

الحال بيختلف في كل طيارة وتركيبتها طبعًا، لكن في أغلب الأوقات، المضيفين بيجيبوا الحاجات اللي بيقدموها للمُسافرين من آخر الطيارة، فأي مكان في الآخر بيبقى عليه زحمة وحركة كتير. بالإضافة لكده، شركات الطيران بتحاول تقعّد العائلات مع بعض في الأخر، فلو مش هتستحمل الأطفال والدوشة بلاش كرسي في الأخر.

5- قريب من الشباك مش دايما أحسن اختيارمصدرالصورة: grazia
معظمنا بيحب الكرسي اللي جنب الشباك، عشان نقدر نتفرج على العالم من فوق ونشوف مناظر جميلة. أوقات كتير كمان الكرسي ده بيساعدك تسند راسك عليه وتنام. بس ده مش الوضع في كل الحالات، لو هتسافر بالليل، فمش هتشوف أي حاجة تُذكر من الشباك، أما عشان النوم، فلازم تتأكد من إن المساحة ما بينك وبين الشباك هتكون قريبة، بحيث إنك تقدر تسند راسك، لإن بعض الطيارات المساحة فيها بتكون بعيدة فهتوجعلك رقبتك لو قررت تسندها.

6- نزل أبليكيشن Seatalerts

موقع Expertflyer عمل أبليكيشن لطيف بيساعدك في حالة إنك وإنت بتختار المكان ما لقيتش ولا كرسي حلو، فاضطريت تحجز أي كرسي وخلاص. هتسجل معلومات رحلتك على Seatalerts، وهو بيقولك أول ما كرسي تاني بيفضى. أوقات كتير مُسافرين بيأجلوا رحلتهم أو بيلغوها، ساعتها انت آول واحد هتعرف فتدخل على موقع الحجز وتغير مكان كرسيك، تقدر تعمله داونلود من Google Play أو App Store