share this article

لو سألت أي حد من اللي رجليهم واخدة على سيوة بيروح كتير ليه، هتبقى فتحت على نفسك فتحة سوداء. هتسمعه بيتكلم ساعات عن السلام النفسي اللي بيحسه في البلد بطريقة محسهاش في أي حتة – مع إن صاحبك ده مبيقعدش وبيسافر مكان مختلف كل شوية. هتسمعه كمان بيتكلم عن طيبة وجدعنة أهل البلد اللي بيبقوا شايلينه على الأرض في كل مرة يزورهم فيها وبيضايفوه زي ما يكون واحد من العائلة، وهيقولك عن المرة اللي نسي فيها االلاب توب في قلب البلد ورجع بعدها بشوية لقاه في مكانه. صاحبك هيقولك عن أحلى أكل أكله في حياته في سيوة. هيحكيلك كمان عن البحيرات المالحة اللي لونها زي ما يكون مرسوم بألوان زيت على لوحة، ولونها أنقى من السماء اللي فوقها ومحاطة برمل من كل حتة. ويا سلام لو كنت في سيوة وقت الغروب ولقيت نفسك في فطناس أو طغاغين، هتشوف منظر هينسيك أي حاجة تانية غير قد إيه إنت محظوظ إنك هنا في الوقت ده. صاحبك هيكلمك كتير اوي على سيوة وحبه ليها، وعارف إيه الغريب؟ إن عنده حق في كل كلمة قالها، ومش بعيد ما يكونش ادى سيوة وجمالها حقهم كمان. طب لو إنت زهقت من رغي صاحبك وعايز تعيش الجمال ده كله بنفسك هتبتدي منين؟

الناس والأماكن في سيوة
اتحرك ازاي؟ تروح لسيوة وتتحرك جواها ازاي
أبات فين في سيوة؟ الفنادق، والهوستيلز، والبدائل ليهم
أعمل ايه في البلد؟ سيب نفسك لسيوة
أكل فين؟ الأكل المحلي وتلاقيه فين
برا سيوة: رحلات صدة ردة من سيوة
سيوة تنفع لدول ولا لأ؟: العائلة، البنات، والحيوانات
أصلي فين؟: العبادة في سيوة
الصحة والأمان في سيوة
البنوك والATMs
نصائح عن خبرة

 

الناس والأماكن في سيوة

سيوة واحدة من أكتر الأماكن عُزلة في العالم، بليل لو وقفت ساكت شوية مش هتسمع غير نفسك، سكانها حوالي 35 ألف شخص ومعظمهم شغال في السياحة أو الزراعة. الجو في سيوة صحراوي بنسبة كبيرة، يعني حر جدًا في الصيف وفي الشتاء الصبح دافي وبالليل شعر رجلك هيقع من البرد. الناس في سيوة طيبتهم هتحسسك بالقلق من كتر ما مش طبيعي إن يبقى في ناس بالطيبة والكرم ده، بس متقلقش، هما كده فعلًا، والدنيا في سيوة أمان بشكل مضحك، يعني عادي خالص واحد ينزل ويسيب مفتاحه في عربيته والشبابيك مفتوحة وهترجع تلاقيها زي ما هي!

أهل سيوة قبائل أمازيغية، وعاداتهم وتقاليدهم مميزة ومختلفة جدًا عن بقية مصر، وبسبب انعزال سيوة عن المناطق المحيطة هتلاقي أن أغلب عاداتهم وتقاليدهم متغيرتش على مر التاريخ. اللغة هناك أمازيغي وعربي، وهتلاقي كل أهل سيوة بيتكلموا الاتنين كويس جدًا، بس بيتكلموا مع بعض أمازيغي ومع أي حد ضيف عربي، ومعظمهم بيتكلموا إنجليزي كويس جدًا كمان بحكم تعاملهم مع سياح كتير.

 

اتحرك ازاي؟ تروح لسيوة وتتحرك جواها ازاي

ازاي أوصل لسيوة

اتوبيس

ممكن تحجز أوتوبيس سيوة من شركة غرب ووسط الدلتا، وليه محطتين في القاهرة ممكن تركب منهم، ألماظة أو عبد المنعم رياض، التذكرة ب 185 جنيه، والأوتوبيس بيطلع كل يوم سبت واتنين وخميس، وبيتحرك الساعة 10:15 بالليل، الرحلة بتعمل 10 ساعات تقريبًا، بتزيد شوية أوقات حسب الجو والكماين.

من اسكندرية الموضوع أسهل، هتركب من محطة "محرم بك"، وممكن برضه تحجز من "محطة الرمل" لكن الموقف نفسه في محرم بك، في العادي بيبقى فيه ٤ أوتوبيسات كل يوم رايح جي على سيوة، كلهم من شركة غرب الدلتا، هتحتاج تتأكد من المواعيد لإنهم كل فترة بيتغيروا، خصوصا وانت راجع من سيوة سواء للقاهرة أو اسكندرية، احنا صورنالك الجدول بتاعهم بس لازم لازم تتأكد من المواعيد عشان بتتغير كتير.

الأوتوبيس أكيد أريح من الميكروباص والسواقة، لكن ده مش معناه إنه مريح في العموم، الكراسي ضيقه إلى حد ما، والمسافة طويلة جدا، بنقترح عليك تاخد مخدة السفر معاك، وخد شال احتياطي عشان لو التكييف كان شديد، وسماعاتك في ودنك لما يشغلوا أفلام، إنت كده مستعد للاشتباك.

خلي بالك: وانت راجع مش هتعرف تحجز الاوتوبيس غير في نفس يوم السفر، ماينفعش تحجز قبلها، في العادي هم بيفتحوا بعد العصر، بس نصيحة ممكن تفوت عليهم قبل العصر عشان أوقات بيفتحوا بدري، خصوصا في الأيام اللي بيبقى فيها زحمة، زي أوقات عيد الصلح وعيد التمور، والكريسماس.
أوقات برضه وقتها بيعملوا اتوبيس للقاهرة كل يوم لما بيبقى فيه ضغط، بس كل الحاجات دي بتبقى حسب الموسم وملهاش قاعدة ثابتة، عشان كده دايما أمن نفسك بإنك تسأل هناك، أو تسأل الجايد السيوي اللي معاك.

ميكروباص 

هتركب ميكروباص مطروح من منطقة مشعل في الهرم ، وبعد كده هتركب من مطروح ميكروباص تاني لسيوة. الرحلة دي بتاخد حوالي 8 - 9 ساعات، فهي أقل من الباص بس الأوتوبيس أكيد أريح.

العربية

لو انت من اللي ما بيفرقش معاهم السواقة لعدد ساعات طويلة، الطريق بالعربية بياخد 7 ساعات، ويستحسن طبعا يبقى معاك حد يبدل معاك في الطريق، مبدئيا محتاج تختار التوقيت اللي هتسافر فيه بحيث آخر ٣ ساعات في الطريق يبقوا والدنيا منورة، لإن فيه جزء مكسر في الطريق قبل سيوة، وهتحتاج تبقى شايف الطريق قدامك عشان الحفر والتكسير، قدامك طريقين يا طريق العلمين - الساحل - مطروح، يا طريق الضبعة اللي بيبتدي من أكتوبر، دي تفضيلات شخصية، آخر 300 كيلو من من مطروح لسيوة مافهمش خدمات ولا محطات بنزين ولا شبكة موبايل، فاحنا بننصحك لازم تحط بنزين من البنزينة اللي على مدخل مطروح، فيه بنزينة جديدة اتعملت لكن قبل سيوة بكام كيلو فمش هتسعفك لو انت مش مفول العربية.

اتحرك ازاي جوة سيوة

لو معكش عربية أو مأجرين ميكروباص معاكم، هتحتاج مواصلة علشان تتحرك جوه سيوة أو تروح للملاحات أو غرب سيوة.

عجلة

أيوة، إنت قريت صح، عجلة. سيوة مش كبيرة وممكن تتحرك فيها بسهولة بالعجلة وأهو فرصة تستكشف الطبيعة. ممكن تأجر عجل من مدخل شالي المدينة القديمة بحوالي 50 جنيه في اليوم وتلف في المدينة تشوف الطبيعة من غير ازاز عربية.

كاريته

لو مش عارف إيه الكاريته، دي عربية بيجرها حمار، والكاريته مناسبة للحركة جوه المدينة وبتتفق على السعر مع صاحبها، بيبقى بالمشوار أو الساعة على حسب احتياجك.

توكتوك أو تروسيكل

ده اختيار لطيف ومش غالي، وممكن تتفق مع واحد يبقى معاك طول اليوم، أو مثلًا تأجر بالساعة (برضه بالإتفاق، ممكن 50 جنيه مثلًا في الساعة). وممكن كمان تتفق مع واحد يوصلك مكان ويجيلك بعد فترة، ومواعيدهم كويسة ومحترمين جدًا.

تُمناية

 دي العربية السوزوكي الصغيرة، وبتشيل 4-5 أشخاص وبتتفق على السعر مع صاحبها، في الغالب السعر بيبقى بالساعة أو المشوار برضه.

ميكروباص
ده بيشيل لحد 14 واحد، وبتتفق على السعر مع صاحبه، بتفرق هتأجره من فين لفين، وكام ساعة في اليوم وهيستناكوا ولا لاء.

عربية ملاكي

العربيات هناك كبيرة، دفع رباعي، وممكن تشيل 6 مثلًا أو 7 لو هتزنقوا، بس غالية طبعًا وممكن توصل ل1000-1500 جنيه في اليوم، بيعتمد على جوه البلد ولا في الصحراء، عشان سعر دخول الصحراء بيبقى أعلى بشوية من 1200 -1500 ، بس كده كده انت مش هتاخد عربية لوحدك.

 

 ابات فين في سيوة؟ الفنادق، والهوستيلز، والبدائل ليهم

فنادق بيئية (Ecolodge)

Ghaliet Ecolodge


العنوان: غاليت
رقم التليفون: 01119782111
متوسط السعر لليلة واحدة: 350 ج.م

تاليست سيوة

العنوان: طريق  المراقي
رقم التليفون: 01006445881
متوسط السعر لليلة واحدة: 500 ج.م

Siwa Relax Retreat


العنوان: طريق المراقي
رقم التليفون: 01280000274
متوسط السعر لليلة واحدة: 700 ج.م

Taziry Ecolodge Siwa


العنوان:
قرية المراقي
رقم التليفون: 01016333200
متوسط السعر لليلة واحدة: 2500 ج.م

Adrere Amellal


العنوان:
جبل جعفر،  المراقي
رقم التليفون: 20227367879
متوسط السعر لليلة واحدة: 6500 ج.م

 

HOTELS

فندق كيلاني


العنوان: طريق  الشهيد عزمي الكيلاني، ميدان السوق
رقم التليفون: 0464600274
متوسط السعر لليلة واحدة: 180 ج.م

Siwa Inn Am Agbenek


العنوان: رمل الحدادين، جنب محطة الكهرباء
رقم التليفون: 01003332042
متوسط السعر لليلة واحدة: 250 ج.م

Shali Lodge Siwa


العنوان: ميدان السوق
رقم التليفون: 0464601299
متوسط السعر لليلة واحدة: 400 ج.م

البابنشال سيوة


العنوان: ميدان السوق
رقم التليفون: 046460199
متوسط السعر لليلة واحدة: 400 ج.م

طاغاغين ايلاند ريزورت


العنوان: بحيرة سيوة
رقم التليفون: 01289991991
متوسط السعر لليلة واحدة: 550 ج.م

ممكن تقضي يوم (day use) في طغاغين بحوالي 100 جنيه، أو تيجي تتفرج على الغروب فيه ب 60 جنيه (آه في ناس بتيجي مخصوص عشان تحضر الغروب هناك).

Dehiba Resort


العنوان: طريق  المراقي
رقم التليفون: 01000883388
متوسط السعر لليلة واحدة: 630 ج.م

فندق نور الواحة

العنوان: واحة سيوة
الإيميل: aloushsiwa@gmail.
متوسط السعر لليلة واحدة: 720 ج.م

Siwa Safari Garden Hotel


العنوان: شارع عين العرايس
رقم التليفون: 01158421897
الإيميل: reservations@siwagardens.com

البيوت السيوية:

ممكن كمان تنزل في بيت سيوي معمول من الكرشيف، ممكن لو انتوا جروب تاخدوا البيت كله ليكم بحيث تحافظوا على خصوصيتكم، وفي نفس الوقت تبقوا في حضن شالي المدينة القديمة، فقريببن من كل حاجة.

Fahmi's Garden

العنوان: سيوة
البيت فيه حمام وأوضة نوم ومطبخ، ممكن تحجز من على Airbnb
متوسط سعر الليلة حوالي 200 جنيه مصري

بيت سانتاريا:

العنوان: شالي
البيت فيه حمام ومطبخ ورووف ممكن تشرب فيه الشاي السيوي على الفحم
متوسط سعر الليلة للغرفة 550 جنيه مصري
تقدر تحجز من على Airbnb

Traditional Siwan Eco House

العنوان: وسط سيوة
ده بيت عائلة بياخد حوالي 7 أفراد وليه ساحة صغيرة خاصة بره البيت، ممكن تحجز من Airbnb
متوسط سعر الليلة حوالي 2400 جنيه مصري

*الأرقام دي محسوبة على إقامة شخص واحد في أزحم وقت في الموسم.

 

أعمل ايه في البلد؟ سيب نفسك لسيوة

سيوة مش بيروت، يعني لو عامل حسابك على سهر وبارات ورقص فإنت غالبًا رايح المكان الغلط، لو إن هتلاقي قعدات كتير كلها رقص ومزيكا سيوي بس مش زي ما متخيل. بس لو عامل حسابك تطلع تدور على سلامك النفسي اللي المدينة نسفته، وتريح دماغك من كل اللي شاغلك، وفوق كل ده تشوف طبيعة مش هتشوف زيها في حياتك، يبقى سيوة المكان الصح ليك.

فن، وثقافة، وتاريخ

سيوة فيها أماكن كتير أوي تتراح لو بتحب التاريخ والأثار، وغير كده في مهرجان سنوي بيتعمل في سيوة بيحتفلوا فيه بالسياحة والحصاد. المهرجان ده اسمه "عيد الصلح" أو "عيد السياحة"، عيد الصلح مش مهرجان موسيقى بالمعنى التقليدي، هو احتفال وبيبقى فيه موسيقى وأناشيد وأدعية دينية. في أكتوبر من كل سنة لما القمر بيبقى مكتمل، عيد الصلح –أو عيد السياحة أو عيد االسلام- في واحة سيوة بيتعمل لمدة 3 أيام متتالية على جبل الدكرور. الاحتفال ده أصوله بترجع لأكتر من 160 سنة لما قبائل سيوة اتحدوا وتصالحوا بعد سنين من الصراع، من ساعتها وهما بيتجمعوا كل سنة في نفس الوقت عشان يحتفلوا بالحصاد والسلام والسياحة. في الأحتفالية دي، كبار القبائل بيجتمعوا عشان يحلوا أي خلافات حصلت على مدار السنة اللي قبلها وبيعملوا كده بعد الحصاد علشان لو في حد مديون يعرف يسدد للي مديون له.  بعد كده بيبقى في وليمة كبيرة واحتفالات بمشاركة أهل سيوة. الاحتفال ده بيجذب سياح كتير بيبقوا عايزين يحضروا المناسبة دي ودايمًا أهل سيوة بيرحبوا بيهم ويضايفوهم.

دول شوية من الأماكن اللي ممكن تزورها وإنت في سيوة:

معبد آمون

ده معبد للإله آمون، وهو نفس المعبد اللي اتنصب فيه الأسكندر الأكبر كإبن للإله آمون، وبيتسمى برضه معبد الوحي، معبد النبؤات لإن الأسكندر الأكبر سأل فيه الكاهن الأكبر اذا كان هيحكم العالم ولا لاء، والكاهن قاله إنه هيحكمه لكن مش لوقت طويل، ودي النبوءة اللي اتحققت فعلا، ومعبد الأسكندر طبعا عشان هو المعبد اللي حصل فيه التنصيب،  قدر منه تشوف سيوة كلها من فوق، ويعتبر من المزارات السياحية المشهورة في سيوة، دخوله بـ 20 جنيه مع جبل الموتى في نفس التذكرة.

قلعة شالي (سيوة القديمة)

دي المدينة اللي كان عايش فيها أهل سيوة زمان، اضطروا يبنوها بعد هجمات البدو والعرب، سابوا المنطقة اللي كانوا عايشين فيها عند معبد آمون، واختاروا منطقة عالية بنوها بالكرشيف، مزيج من الطين والملح، وعملولها بوابة واحدة كان اسمها "باب إنشال" يعني بوابة المدينة، المدينة فضلت صامدة قدام الهجمات لحد وصول محمد علي وجيشه لسيوة، ابتدى ساعتها السيويين في النزول من القلعة وبناء البيوت تحت في الأرض الواسعة، وجت السيول عشان تجبر باقي الأهالي انهم يسيبوها وينزلوا بالكامل وتفضل المدينة أطلال دليل على حكايات كتير لسه ما اتحكتش، بقايا المدينة لسه باقية بتصميمها البيئي الجميل، وحاليًا في أعمال ترميمات فيها المفروض تخلص سنة 2020، بس برضه لو عرفت تطلع وتبص من فوق، هتشوف سيوة كلها بجمالها.

معبد أم عبيدة

ده معبد تاني للإله آمون، قريب من المعبد الأولاني، بس ده متدمر مش باقي منه غير بقايا صغيرة عبارة عن حائط واحد مترمم في الهواء الطلق وعليه نقوش فرعونية، ده نفس المعبد اللي كان في رواية ومسلسل "واحة الغروب."

متحف البيت السيوي

ده متحف معمول بنفس شكل البيوت السيوية التقليدية من الطوب اللبن وجذوع النخيل، وهتلاقي فيه تاريخ الحياة السيوية وتطورها ومراحلها المختلفة. جواه كمان حاجات كتير بتعبر عن التراث السيوي الأصيل.

جبل الدكرور

ده واحد من أكبر جبال سيوة، ومن فوقه تقدر تشوف سيوة وكل حاجة حواليها، وده نفس الجبل اللي بيتعمل فيه عيد السياحة. جبل الدكرور كمان معروف برماله الساخنة اللي بتستعمل في العلاج – بيتعمل فيها حمامات رمال سخنة قادرة على علاج الأمراض الروماتيزمية وآلام العمود الفقري والأمراض الجلدية.

منطقة الحفريات في بحر الرمال الأعظم

دي فيها حفريات من من ملايين السنين أيام ما كانت المنطقة دي جزء من المحيط، بتروحلها بعربية 4x4 عشان في قلب الصحراء. هتشوف بقايا عظم حوت ضخم، وقواقع ونجوم بحر متحجرة. لو ملكش في الكلام ده متضيعش وقتك وتروح عشان هتزهق.

ضريح سيدي سليمان

سيدي سليمان هو إمام السيويين وأشهر شخصية في سيوة. أهل الواحة بيحكوا عن سيدي سليمان أنه كان قاضياً محترم وتقي، وبيحكوا عنه اساطير كتير.

مركز سيوة لتوثيق التراث

ده مركز تبع مركز توثيق التراث الحضاري والطبيعي، التابع لمكتبة الإسكندرية ومدعم من وزارة الاتصالات وتكنولوجيا المعلومات. المركز بيوثق جوانب التراث السيوي من عادات وتقاليد وحرف وصناعات يدوية وفن قديم وموسيقى وشعر ونحت، والمحميات الطبيعية، وطرق الري والبناء القديمة.

حاجة شعبي

 الصحراء

 دي ممكن يتكتب فيها كتب، الصحراء في سيوة من أجمل الحاجات اللي ممكن عينك تشوفها. اللي هتعمله هو إنك هتأجر عربية 4x4 بسواقها اللي هيبقى حافظ الصحراء بشكل يخضك، وهتقوله يوريك الصحراء. ممكن تطلع تتغدا في كامب في وسط المجهول وتاكل أبو مردم (فراخ مدفونة في الرمل وبتتساوى فيها)، وبليل تيجي وتبات في نفس الكامب ده تحت ضوء القمر والنجوم وجنبك نار بسيطة. ممكن في يوم تاني تطلع في مغامرة مع السواق وتشوف بيعملوا إيه في الصحراء بعربياتهم، وصدقني/ هتنبهر.

تصاريح الصحراء: الصحراء لازم يطلعلها تصريح من الجيش، التصريح ب50 جنيه للفرد، والعربية بالسواق ب100 جنيه، اديله صور البطايق والفلوس وهو هيتصرف ما تقلقش.

سوق شالي

 تقدر تشتري من هناك المشغولات اليدوية زي اللبس السيوي والكليم والمفروشات والسجاد، وتقدر كمان تجيب التمور والزيتون وأنواع مربات مش موجودة غير في سيوة، زي مربى كركديه وبلح وزيتون ودول فعلًا كلهم أحلى من بعض. ممكن كمان تجيب الأباجورات المعمولة من الملح اللي بيبقى شكلها جميل فعلًا ويقال كمان إنها بتسحب الطاقة السلبية حواليها.

احضر قعدة سيوي

الغناء الجماعي أكتر نوع غناء شعبي منتشر في سيوة، وهو غناء طقوسي مرتبط بمواسم ومناسبات زي الزواج والميلاد ومواسم الحصاد، والغناء في سيوة عادةً بيبقى حول الغربة والهجر والحب والحكم. جرب اقعد في مطعم أو في قهوة لحد بليل وغالبًا هتلاقي فجأة الدفوف طلعت وابتدوا يرقصوا ويغنوا وهتبقى من أحسن القعدات اللي ممكن تقعدها عشان بيبقوا مبهجين فعلًا.

الطبيعة

 سيوة عبارة عن طبيعة بس، أي حتة تروحها هتلاقي نفسك متحاوط بمنظر طبيعي، نجوم أوضح من أي حتة تانية وصحراء هادية وجميلة، وحاجات تانية كتير.

الدفن في الرمال

الرمال في سيوة بتستعمل لعلاج أمراض الروماتيزم والعظام والتوتر وحاجات تانية كتير، بقالها مئات السنين. سياح كتير بييجوا سيوة كل سنة عشان يتدفنوا في الرمال فترات متقطعة على كذا يوم عشان فوائدها العلاجية. أنسب وقت للسياحة العلاجية دي في الصيف، بالأخص في أغسطس. التكلفة للفرد من غير أكل وإقامة بتبقى من 300-400 جنيه يوميًا.

البحيرات المالحة

هتلاقي في سيوة بحيرات مالحة ألوانها لون السماء وتركيز الملح فيها عالي جدًا، يعني مهما كنت مش بتعرف تعوم عمرك ما هتغرق من كتر ما المياه تقيلة. في 4 بحيرات مالحة في سيوة أساسيين، بحيرة الزيتون شرق سيوة، بحيرة أغورمي (أو المعاصر) شمال شرق الواحة، وبحيرة سيوة غرب مدينة شالي، وبحيرة المراقي غرب الواحة بمنطقة بهي الدين.

عيون المياه

في ناس بتيجي مخصوص لسيوة عشان العيون دي، بسبب قدرتها العلاجية الطبيعية. هتلاقي منها الساقع والسخن، وعيون المياه العذبة وعيون كبريتية ودي من التجارب الجميلة وكلها استرخاء. هتلاقي عين فطناس في جزيرة فطناس نفسها، وعين كليوباترا اللي هي من أشهر مزارات سيوة، هي عبارة عن حمام من الحجر بيتملي من مياع الينابيع الساخنة الطبيعية.

بير واحد

ده مثلًا جوه بحر الرمال الأعظم، تخيل كده إنك تفضل ماشي حواليك صحراء بس، وفجأة تلاقي نخل وشجر بلح في وسط كل ده وعين مياه سخنة في النص! الأجمل من كده، المياه بتفضل ماشية تحت الأرض سخنة وبتبرد لحد ما توصل لبحيرة باردة على بعد كذا كيلومتر! لما تنزل تعوم شوية في البحيرة الباردة اللي في وسط الصحراء دي، هتعوم في أحلى مياه ممكن تنزلها في حياتك.

عين فطناس

 العين دي موجودى على جزيرة فطناس ومن العيون اللي ناس كتير بتحب تنزلها.

عين أبو شروف

دي عين غلى بعد حوالي نص ساعة من سيوة، وزي ما باين هي صغيرة بس النزول فيها لطيف جدًا.

عين كليوباترا

دي عين تانية قريبة من قلب سيوة، عرضها حوالي 40 متر، وعمقعها حوالي 10 متر، واندفاع المياة فيها كبير جدا، من وقت للتاني بيقوم الأهالي اللي حوالين العين بتنضيفها من المخلفات والشوائب، بتتسمي برضه عين الشمس وعين جوبا، ومن الأساطير اللي بتتقال عنها إنها العين اللي استحمى فيها الأسكندر الأكبر قبل تنصيبه في المعبد، فيه جنبها كافيه لطيف جدًا بيعمل مشاريب جميلة، والقعدة نفسها ممتعة.

جزيرة فطناس

هتلاقي جزيرة فطناس على بعد 5 من غرب سيوة، ودي بتطل على بحيرة مالحة. فطناس من أشهر الأماكن السياحية في سيوة عشان المنظر الجميل منها ومن أحلى الحتت اللي ممكن تشوف فيها غروب في حياتك وهناك هتعرف ليه سيوة اتسمت "واحة الغروب."

جزيرة طغاغين

جزيرة طغاغين على بعد حوالي نص ساعة من قلب سيوة، ولو فطناس من أحلى الحتت اللي ممكن تشوف فيها الغروب، فطغاغين أحلى مكان ممكن تشوف فيه الغروب في سيوة وغالبًا حياتك، ننصحك تروح هناك بالمزيكا بتاعتك، وحاول تنفصل عن العالم، دي فرصة ما بتتكررش كتير.

لقد وقعنا في الفخ (مزارات سياحية ممكن ماتزورهاش في سيوة ومش هتخسر حاجة)

مقابر بلاد الروم

دول مجموعة مقابر صخرية من أيام  العصر الروماني. هتروح هتلاقي جبل، وفيه كذا فتحة (مداخل المقابر)، جوه الفتحات دي مش هتشوف غير أكياس شيبسي فاضية، فمتضيعش وقتك هناك أحسن، ولو إن المنظر من فوق التلال اللي هناك لطيف.

 

 أكل فين؟ الأكل المحلي وتلاقيه فين

هتلاقي في سيوة أغلب أنواع الأكل العادية اللي بتاكلها في القاهرة، لكن المحلات مش كتير. هتلاقي هناك مطاعم زي عبده، نور الواحة، المطعم السيوي، كنوز، علي عليوة، كلهم أكلهم حلو جدًا، والأسعار أقل من اللي ممكن تدفعه في القاهرة. يعني في عبده عشان تاكل نص فرخة ورز وبطاطس وسلاطات وكانز هتدفعلك 100 جنيه!

لو هتاكل من عبده بنرشحلك : كسكسي بالفراخ/اللحمة/ الخضار- بان كيك بلح - البانيه بتاعهم جميل لو ملكش في الكسكسي، الملوخية السيوي (ملوخية ناشفة) - وفي الفطار جرب الزبادي بالعسل بالموز (الكسكسي ب ٥٥ جنيه)

لو هتاكل من كنوز بنرشحلك : مكرونة بالريحان (بتبقى مكرونة بالصلصة بس وعليها ريحان، الطعم كله في الريحان - فراخ بالزيتون -  رمانية - وطبعا لو الفطار لازم لازم تجرب عندهم مربى الجزر ومربى البرتقال، أجمل مربى هتاكلها في حياتك، وبتتباع في البابنشال. (الفراخ بالزيتون ب ٩٥ جنيه).

 لو هتاكل في علي عليوة بنرشحلك: فراخ أو لحمة أو بط معمول بطريقة أبو مردم، الأكل عظيم جدا، والقعدة على الأرض في أوض، الفراخ ب ٤٥ جنيه، واللحمة ب ٨٥ جنيه.
لو هتاكل من كامب علي خالد بنرشحلك: مكرونة جارية مع فراخ مشوية/ أبو مردم، المكان كمان فيه عين مياه سخنه، وبيتعمل فيه أوقات حفلات غناء سيوي.

فراخ بطريقة أبو مردم معمولة في الصحراء

أي أكل في الصحراء بيبقى قيمته أغلى بكتير لإنه بيتنقلك في الأغلب من البلد وسط الصحراء، أو على الأقل بينقلوا المكونات وهم بيعملوه هناك.

في أنواع أكل سيوي لازم تجربها، على راسهم طبعًا الفراخ واللحمة اللي معمولين بطريقة "أبو مردم"، دي طريقة تسوية للأكل، اللحمة أو الفراخ بتتبل كويس لكذا ساعة، بعدين بتتحط في باستيله حديد بتدفن في حفرة فيها نار، عشان كده اسمها أبو مردم، عشان بيتردم عليها، وتتساب تستوي  من ساعة ل ٣ ساعات على حسب النوع، بس النتيجة هتبقى من أجمل الحاجات اللي هتاكلها في حياتك.

في كمان أكلات سيوي ممكن تسأل عليها، بس غالبًا هتتعملك مخصوص لأنها بتتعمل في البيوت زي:
كسكس بالخضار: نفس الكسكسي اللي نعرفه بس بدل السكر حاطين عليه جزر وبطاطس وكوسة وطماطم وبيتقدم معاه فراخ أو لحمة حسب الطلب.
مكرونة جارية: مكرونة عايمة في شوربة صلصلة مختلفة عن اللي نعرفها وبتبقى طعمها مملح شوية.
شكوكة سيوي: لحمة أو كبدة مع بصل وخضار وطماطم وبيض.
رقاق: عامل زي طبقة أو طبقتين من الفطير المشلتت، وبيتعمل في عيد الأضحى.
مجردج: نوع من العيش بيتعمل بيه الفتة.
ايغيارين: بتتعمل من الرجلة والفول وشبه البصارة في الشكل لكن الطعم مختلف، وبيتحط عليها زيت زيتون وبتتاكل بالعيش.
اشنجوط: لحمة بط أو فراخ وبيض بلدي بيتلفوا في عيش ورقاق وده بتاع العرسان.
مفقد: دي الفتة بس مختلفة عننا إن مافيهاش رز. 
تارفنت: عيش ونوع بلح وزيت زيتون.
أنجيل: نوع من العيش معمول من عصير البلح بيتاكل مع الفول المحمص.
تاجيلا: بلح ودقيق وزيت زيتون
المخمخ: ده نبات كده بيطلع وسط الزراعات، وبيتعمل بنفس طريقة الملوخية وبيتعمل معاه لحمة ضاني.
البسيس: وده عبارة عن حلويات معمولة من التمرالمطحون أو الحمص الناشف بالسكر
تانقوطعت، عبارة عن قطع من شرائح العجين، بتتقدم بعد الولادة قبل السبوع وبتتاكل ع الفطار،
ناسقدن مجردج: دي أكلة بتتعمل في ليلة القدر،المجردج ده العيش الناشف اللي بيتحط ع الفتة، الأكلة نفسها بتبقى عشرين حاجة في بعض، فتة مع البط أو اللحمة أو الفراخ، وحمص مسلوق، وزبيب ومكسرات.

 

الأكلات دي لازم عشان تاكل منها توصي عليها قبلها بيومين، وخلي بالك اللي بيعملك أكلة زي دي ما بيعملش طبق على قد شخص واحد، كل أكلة من دول بتتعمل حجم عائلي، فحاول تطلبها لما تبقوا عدد كبير عشان كمان سعرها يتوزع عليكم، كل الحاجات اللي فيها بروتين هتبقى غالية أكيد.
المطبخ السيوي طعم الأكلات فيه جميل جدا، لكن شكلهم ما بيدلش على ده، الأكلات اللي زي البسيسة وتاجيلا، بيبقوا عبارة عن عجينة وبتتاكل بالصوابع مش بالعيش، فانت محتاج تحدد كويس انت عايز إيه بالظبط، وما تتخضش لو شوفت شكل الأكل غريب بالنسبة لك، الطعم يستاهل.

 

 بره سيوة: رحلات صدة ردة من سيوة

واحة الجارة

واحة الجارة هي واحة صغيرة منعزلة على بعد حوالي 75 كم شمال شرق سيوة، وتعداد الجارة قليل جدًا – حوالي 500 فرد  - ويقال إن في الواحة لو مولود اتولد، في حد عجوز بيموت. الجارة مكان لو رحته هتحس إنك لوحدك في الصحراء والمناظر الطبيعية هناك جميلة جدًا والمكان كله يرخي الأعصاب كده، الواحة شبه سيوة بس من 150 سنة، لما كانت الطبيعة النقية وبس من غير كهرباء وعربيات وكده، عشان تروح هناك هتحتاج تظبط مع حد سيوي لإن في طريقين واحد قصير حوالي ساعتين والتاني حوالي 4 ساعات، بس مع الأسف الطريق القصير مش مفتوح طول الوقت، فانت وحظك في اليوم ده.

 

 سيوة تنفع لدول ولا لأ؟: العائلة، البنات، والحيوانات

البنات

سيوة أمن جدًا لكل البشر بصفة عامة، والبنات معندهمش سبب يخافوا وهما هناك لإن أهل سيوة طيبين ومحترمين جدًا، وهي كمدينة سياحية تقدري تلبسي فيها براحتك من غير مضايقات، المايوهات برضه مفيهاش أي مشكلة.

العاثلات

سيوة مكان مناسب تاخد فيه عائلتك وتفسحهم وهتلاقي أجواء أسرية لطيفة جدًا وسط الطبيعة والهدوء.

الكلاب والقطط

سيوة عاملة زي دهب في الحتة دي، الحيوانات متعايشة مع البشر في سلام تام وهتلاقي كلاب في الشارع جاية تحضنك حرفيًا، وكل ما تروح هيعرفوك ويجروا عليك يلعبوا معاك.

 

أصلي فين؟: العبادة في سيوة

سيوة أهلها مسلمين، ومش هتلاقي كنائس هناك، بس في جوامع كتير. على الرغم من كده، لو إنت مش مسلم عمرك مش هتحس إنك مش مرتاح عشان أهل سيوة متسامحين مع الكل جدًا، وهتعرف تمارس دينك (أو تعبد ستيفين هاوكينج حتى لو عايز) براحتك ومحدش هيكلمك. بس رمضان مش أنسب وقت تروح فيه عشان كل البلد بتقفل بعد المغرب، وبتقفل بالنهار، فمش هتعرف تعمل حاجة خالص.

 

الصحة والأمان في سيوة

الإسعاف: 123
المطافي: 180
شرطة السياحة: 126

مستشفي سيوة المركزي

 العنوان: شارع الرمل
رقم التليفون: 0464600459
ساعات العمل: طوارىء 24/7، عيادات من 9 ص – 2 م

 

البنوك والATMs

بنك القاهرة


العنوان: التكية، جنب قسم شرطة واحة سيوة
رقم التليفون: 16990
ساعات العمل: 8:30 ص – 2 م، الأحد للخميس

 

 نصائح عن خبرة

  1. الناموس في سيوة مبيرحمش، يعني لازم تاخد معاك OFF  أو بيروسول تحطه تحت باطك مثلًا، أي حاجة تبعد عن الناموس، واعمل حسابك هتتخرشم برضه.
  2. الدبان بقى بيستلم من الناموس النباطشية الصبح، والدبان في سيوة بيلزق وبيحب يضحي بحياته في سبيل تكديرك، لو فاكر إنك هترش OFF بليل بس، إنت غلطان.
  3. خد معاك صورتين من البطاقة وش وضهر عشان هتحتاجهم للإقامة ولو هتعمل سفاري في الصحراء.
  4. خد معاك لبس تقيل لبليل ولبس خفيف للصبح، الجواكيت أوبشن لطيف
  5. اعمل حسابك الصحراء هناك مفيهاش شبكة – بس المدينة فيها – فلو ناوي تبات في الصحراء بلغ أهلك إنهم مش هيعرفوا يوصلوا لك بدل ما تلاقي أمك كلمت الانتربول عشان فاكراك اتخطفت.
  6. هتلاقي محلات بقالة هناك فيها أي بقالة ممكن تحتاجها، وقزايز المياه بتتباع عادي، موجود كروت شحن، اكسسوارات الموبايلات بس مش هتلاقي أي حاجة تخص الكاميرات فهات كل حاجتك معاك.
  7. لو نسيت المايوه هتعوم بالبوكسر، إنت مش طالع دهب فمش هتلاقي حد بيبيع مايوهات.
  8. اشرب لويزا هناك (حاجة معمولة من أعشاب الليمون)، ودي حلوة أوي بالذات لمرضى القولون، بتريح جدًا.
  9. خد معاك فلوس على قد ما تقدر عشان وإنت راجع هتبقى عايز تجيب نخلة بلح معاك من كتر ما هو حلو، غير المربات والزيتون. لف شوية على الأسعار وشوف أنسب سعر ليك.