share this article

لسه فاكرة أول مرة أخش جوة مطار القاهرة وأنا لوحدي، وكنت مسافرة برة مصر، طول عمري كنت بعدي من المطار والإجراءات الأمنية اللي هناك، بس أول مرة أقف في الطابور بتاع الجوازات وأنا متشعلقة في الباسبور بتاعي، كنت مرعوبة.
الكلام ده كان في 2013، النهارده مبقتش بحب أسافر غير وأنا لوحدي، بحب أتحرك بمزاجي وأروح الحتت اللي أنا عايزاها، وعادي لو فاتني معاد قطر مفيهاش مشاكل، ومش هيحصل حاجة لو شربت قهوة في أي مكان في الشارع في أي وقت بحبه، وهكذا، الأهم من ده كله، مفيش حاجة هتعرفك نفسك وهتعلمك كتير عن شخصيتك أد السفر لوحدك.

بس متفهمنيش غلط، السفر لأوروبا مثلًا أو استكشاف أفريقيا مع أعز أصدقائك وأحبابك متعة تانية ومفيش أحلى من كده، بس فيه طبع فينا كبشر -مش بس مصريين- إننا نخلع من أي خطط طويلة المدى، وسواء بسبب المصاريف، الشغل، أو أي التزامات تانية، ده بيبقى معناه إن الخطط اللي بتبقى متظبطة كمجموعة من الناس؛ بتفشل في كتير من الأوقات.

أول رحلة

معظم الناس هتقولك سافري بلد عربي، مكان تعرفي تتكلمي لغته؛ دي نصيحة كويسة، بس الموضوع ده مش بيبقى مهم في الحقيقة، هتعرفي تتعاملي في أي بلد هتروحيه طالما معاكي إنترنت على الموبايل، وحتى لو مش معاكي في كتير من الأوقات الدنيا هتمشي برضه.

بس عشان تعرفي تنجزي في رحلتك، بنصح تروحي بلد فيه شبكة مواصلات قوية، عشان تروحي بلد محتاجة فيه كذا وسيط عشان تروحي من مكان للتاني دي حاجة مسلية جدًا، بس محتاجة وقت وصبر كتير؛ مثلًا فيه مرة، اتكلمت لوقت طويل مع 3 أشخاص مختلفين أصحاب محلات في بانكوك عشان أعرف إزاي أوصل لشارع طلع في الآخر على بعد 10 دقائق من الفندق اللي قاعدة فيه!

مرة تانية كنت على أطراف مدينة روما، وفهمت كويس إن فكرة خرائط جوجل عن المواصلات القريبة ملهاش أي علاقة بالواقع، الموضوع خد مني شوية تمشية حلوين عشان أوصل لأقرب محطة باص، أي نعم كان في العراء ومفيش حواليا أي حاجة، وكان فيه عدد كبير من المشردين مريحين هناك، بس كل ده جزء من التجربة، الفكرة إنك تبتدي بمكان بسيط، سهل تتحرك فيه، وبعد كده نبقى نشوف موضوع وجهات أحلامك دي.

 

المعضلة اللي بتواجه أي حد معاه جواز سفر مصري هي إنك تقنع السفارة أو مركز تقديم الفيزا إنك هترجع، وأنا بأكدلك إن كونك مسافرة لوحدك مش بتفرق خالص في الحتة دي، معظم الوقت، طالما أوراقك مظبوطة ومعاكي فلوس كفاية تغطي فترة السفر، وطبعًا كل ما يبقى عندك أختام فيزا أكتر في جوازك، كل ما يبقى أفضل.

تظبيط الخطة

نخش في المهم بقى، اطحني نفسك تدوير في كل المعلومات عن وجهتك، إنك تظبطي خطة مش معناه إنك هتحسبي كل خطوة في رحلتك، بس معناه إن هتعرفي تتصرفي في البلد وتتحركي براحتك، وتبقى عارفة تفاصيل مهمة زي التكاليف، المشاكل اللي ممكن تحصل وتتعاملي معاها إزاي، وإيه الحاجات اللي مينفعش تتفوت في البلد.

ابتدي بقائمة فيها كل الأماكن الأساسية اللي عايزه تروحيها، والأنشطة اللي نفسك تجربيها، خلي الخطة مرنة بس في نفس الوقت مترتبة، يعني كل الأماكن والحاجات اللي قريبة من بعض تتعمل ورا بعض عشان توفري وقت.

عادةَ أنا مبعملش حاجة غير إني أتفرج على فيديوهات عن المكان اللي رايحاه في الفترة اللي قبل السفر بتاعت التخطيط، بتاخدي منها فكرة كويسة عن الدنيا عاملة ايه هناك والغلطات اللي الناس اللي عملوا الفيديوهات دي وقعوا فيها.

برضه Google Street View من الأدوات اللي هتنفعك جدًا في السفر، في رحلتي للندن، حفظت شكل الشوارع من محطة القطر لحد الفندق، ووأنا في جنيف، خدت سكرينشوتس للمباني اللي حوالين مطعم كنت عايزه أجربه، فخرائط جوجل مهمة في السفر واعتمادي الأول بيبقى عليها، بس هتلبسك في الحيطة كتير برضه، فاعملي حسابك إنك تخططي كويس عشان تبقى عاملة حساب المشاكل اللي بتطلع فجأة دي زي إن المكان يبقى مش مظبوط على الخريطة أو إن جوجل يبقى فاكرك ماشي في الاتجاه المعاكس، أو إن الخرائط تفضل تفسحك كل شوية في طريق جديد وإنت بتمشي بقالك ساعة في المطر .. كل ده هيحصل، أيًا كان إنتي فين.

 

الإقامة

بعد ما يبقى عندك فكرة كويسة عن عايزة تعملي إيه، ابتدي ظبطي الإقامة؛ هتحتاجي تحجزي فنادق، هوستيلز، أو شقق في Airbnb قد إيه؟ إيه الاختيارات المتاحة بالنسبة لميزانيتك وتبقى في نفس الوقت قريبة من المواصلات؟ إيه أهم بالنسبالك، الرفاهية، المكان، ولا التكلفة؟

شخصيًا، أنا بحب Airbnb جدًا، تقدري تلاقي شقة كويسة أوي في مكان متميز مقابل جزء صغير من تمن أوضة في فندق، وبيبقى عندك فرصة كمان تحتكي بأهل البلد وتاخدي منهم شوية نصائح؛ بالنسبة لينا كستات مصرية، دوري على صاحبة بيت تبقى ست، هترتاحي أكتر وعائلتك كمان هيرتاحوا أكتر.

جربي المواصلات

نزلي كل أبليكشانز المواصلات اللي تنفع في البلد اللي رايحاها، هينفعوكي جدًا؛ جربي الأبليكشانز المختلفة دي كأنك رايحة من المكان اللي قاعدة فيه لشوية من المزارات اللي هتروحيها، قارنيهم بخطوط المواصلات اللي موجودة في خرائط جوجل، هل في تطابق بينهم؟ لو لأ، ارجعي لبلوجز وفيديوهات المسافرين عن إزاي توصلي لمكان معين، ده هيوفر عليكي وقت ومجهود كتير لما تسافري.

فيه مرة في إيطاليا، اكتشفت إن تطبيق المواصلات مفيهوش محطات كتير، ولقيت إن خرائط جوجل هتديني مؤشر أفضل بكتير، بس مواعيد الباص على الاتنين مكانش ليهم أي علاقة بالواقع، وفيه مرة تانية، اختيارات المواصلات على خرائط جوجل في ألمانيا كانوا تهريج، مفيهش محطات كتير واختيارات سفر كتير، قضيت مواصلاتي بشكل كبير عن طريق تطبيقين المواصلات الأساسيين هناك.

تظبيط الميزانية

نيجي لأهم حاجة، الرحلة هتتكلف كام؟ أغلى حاجتين بيبقوا عادةً تذاكر الطيران والإقامة، وكل واحدة ممكن تكتب فيها مقال عن الإختيارات المتاحة، أنا مش أفضل شخص يدي نصائح عن إزاي توفري في المصاريف في السفر، بس ده اللي أنا بعمله بالميزانية اللي بطلع بيها.

بعد ما بطلع مصاريف السفر والإقامة، بحط حد أقصى للمصاريف اللي هصرفها في الرحلة؛ بعد ما بحدد ده، بشيل 10% أو 15% من الإجمالي احتياطي؛ في أي وقت، لازم يبقى معايا فلوس كفاية إني أطلع على المطار وأغير معاد تذكرتي من أي مكان، بعد كده بحسب تكاليف المواصلات والفسحة.

مثلًا: احسب تمن تذكرة مواصلات شاملة أو كارت مواصلات أسبوعي، تكلفة دخول المزارات، تذاكر القطار، وهكذا، بعد كده زود على كل ده تمن مغامرتين كمان على الأقل لسه هتخططلهم.

حسب دماغك، قسمي الباقي على الأكل والشوبينج، أنا عن نفسي بحب أسافر خفيفة، وبشتري منتجات تجميل مش موجودة في مصر بشكل أساسي، باصرف الباقي على استكشاف الكافيهات الصغيرة، المخابز، والمطاعم اللي بشوف المسافرين بيرشحوها، ودي بتبقى فرصة مناسبة جدًا كمان إنك تقابلي ناس جديدة وتستكشفي خبايا البلد؛ مش هعرف أعدلك كام محادثة جميلة قضيتها مع ناس غالبًا مش هشوفها تاني.

نصيحة عن تجربة: لازم تجربي تستكشفي مدينة بحالها على رجلك، على الأقل مرة في حياتك؛ دي أحسن طريقة بجد تستكشف مكان بيها.

حرّصي دايمًا

أحلى حاجة في زيارة بلاد جديدة هي إنك تستكشفي حاجات مختلفة وتخوضي مغامرات وتقابلي ناس، بس لازم تبقى محرّصة دايمًا، ده معناه تتفادي درب مشي جميل لو لقيتي مفيش حد عليه في الوقت ده -حصلتلي قبل كده- ومعناه إنك تقفلي كلام مع حد غريب في نفس المكان اللي قابلتيه فيه، غالبًا باخد احتياطات أكتر من معظم الناس اللي بتسافر لوحدها، بس ده غالبًا المصري اللي جوايا لما بيطلع وأنا مسافرة بره لوحدي.

أهم حاجة تفتكريها إن ممكن أي حاجة تبوظ، ودي حاجة كويسة جدًا عشان بتديكي فرصة تنسي نفسك في التجربة وتعيشي فعلًا، متقلقيش، هتعرفي ترجعي بيتك دايمًا.