share this article

كل البنات أو الستات أو بمعنى أدق كل كائن حي يحمل 2X كروموزوم في الحمض النووي بتاعه بيكون جزء من حياته الدورة الشهرية، وطبعاً ياما أجازات باظت وحاجات تانية كتير بسببها، ولسبب ما وأنا صغيرة قالولي مينفعش أنزل البحر وقت البريود عشان المياه السقعة المالحة هتأثر على خصوبتي الجنسية، وطبعاً دي كانت خرافة من الكتاب الكبير الخفي اللي مليان خرافات متعلقة بالبنات عشان تخلينا مكسوفين ومحرجين من كوننا بنات، الكتاب ده فيه من أول الأسامي الخزعبلية للبريود لغاية حاجة زي ركوب الخيل والعجل بيفقد البنت عذريتها، المهم إني كل مرة كنت بخطط لرحلة كان أكبر جزء من تفكيري بيكون مشغول بالبريود، خصوصاً إن دورتي قصيرة، وأيام النزيف بتكون طويلة، ومش هتكلم عن الكرامبس، الموضوع بيتلم لما بنكون في رحلة عادية، بس لو دي كانت رحلة مشي في الصحرا أو بين الجبال hiking أو تسلق؛ إيه الوضع لما تقعدي لأيام في عزلة عن أي حاجة حتى المياه؟ وطبعاً الكلام ده في العلن ضمن ثقافتنا ممنوع فمفيش حد عنده الجرأة يناقش إزاي تتعاملي مع البريود في أي موقف فما بالك في الجبال! بس بما إننا خلاص بقينا في 2020 أنا قررت إني هسأل ستات قويات بيتسلقوا وبيعملوا رحلات هايكينج عن حاجة عادية وطبيعية في حياتنا البريود.

إنك تتابعي دورتك ده شيء أساسي

إنك تبقي عارفة من بدري البريود جاية إمتى ده هيسهل حاجات كتير، وهيخلي الدنيا أسهل من لما بتطب زي القضا المستعجل، وبما إن إحنا بقينا في عصر كل حاجة في الدنيا لها أبلكيشن، أيوة البريود لها الأبلكيشن الخاص بيها، في الواقع فيه كتير جداً انتي هتختاري اللي يريحك، أنا شخصيا بستخدم Clue، الأبلكيشن هايساعدك تكوني عارفة وقت البريود الجاية وبكده تكوني جاهزة ومتحضرة بكل اللي هتحتاجيه، وغير إنه بيقولك على المواعيد؛ هو بيعرفك معلومات تانية كتير المفروض تكون متاحة لينا بس بحكم مجتمعنا كل ده محشور في القمقم بما إن أصلاً البنت وقت البيريود بتكون نجسة فأكيد مش هنتكلم في حاجة زي كده، وبما إنك هتكوني متحضرة ده ينقلنا للخطوة اللي بعد كده.

إزاي تتعاملي مع البريود

بما إننا خلاص في 2020 فبقى فيه حلول كتيرة مختلفة تتعاملي بيها مع البريود، فيه ناس بتقول إن العلم بطيء جداً في الحتة دي، بس أنا مش بوافق الرأي ده، وعشان كده اتكلمت مع اتنين مغامرين بيعملوا رحلات هايكينج عشان أعرف منهم بيعملوا إيه، زينة اللي مشيت أجزاء من درب باسيفيك كريست Pacific Crest Trail PCT اللي في كتاب "Wild" للكاتبة شيريل سترايد؛ زينة قالت إن في رحلتها اللي كانت مدتها 3 شهور جربت حاجات مختلفة، طبعاً وهي بتجهز الرحلة البريود كانت شاغلة جزء من تقكيرها مش بس الألم؛ لكن كمان القمامة لأن مفيش مكان ترمي فيه أي زبالة وأنت بتمشي في أي درب لغاية أماكن معينة بتقف فيها فممكن تفضل شايل زبالتك لأيام، فكان لازم تلاقي الطريقة الأنسب ليها، بتقولنا: "أنا أستخدمت الـtampons لأنهم أنضف من الفوط الصحية خصوصاً لو هكون لأيام من غير مياه أو حمام، والنقطة التانية إنهم خفاف في الوزن لأني باخد معايا بس العدد اللي محتاجاه، وكمان سهل إني أخلي معايا اللي ااستخدمتهم أسهل من إني أشيل الفوط المستخدمة، وفي جزء تاني من الرحلة استخدمت الـmenstrual cup اللي لقيت إنه عملي أكتر؛ ببساطة أنا مش مضطرة غير إني أشيل حاجة واحدة بس زيادة." المشكلة الوحيدة مع الـcup إنه بيحتاج مياه للتنضيف فهو حل مناسب لما بتكون عارفة إن هيكون فيi مياه زيادة عن الإحتياج الأساسي، الموضوع كله بيكون بسيط مع التجهيز والتخطيط السليم، وإنك تكوني عارفة الأنسب بالنسبة ليكي.

المصدر: PCTA

منة .. مغامرة تانية اتكلمت معاها وحكت عن قلقها من التعامل مع البريود أول لما بدأت حياة المغامرة، بس بسرعة أدركت إن الموضوع مش بالحجم الكبير اللي كانت متخيلاه، وحجم الإستعدادات الجبارة اللي كانت وخداها في أول رحلة لدرجة إنها كانت واخدة كل حاجة ممكن تتخيلوها، أول مرة جاتلها البريود كانت في درب سيناء واستخدمت الفوط؛ بتقول: "أكتر حاجة كانت قلقاني إني مش عايزة أسيب أي مخلفات" ده اللي خلاها ماشية بأكياس بلاستيك زيادة بتفضيها لما بيكون فيه فرصة لده، بعد كده بدأت تستخدم الكاب، وبتكمل حكايتها: "الحل ده غيّر حياتي تماماً، أسهل ومش محتاجة أشيل همّ حاجة طول اليوم ولا إني أغير فوطة"، هي بتقول يمكن الناس تقرف من فكرة الكوباية دي -الـcup هو عبارة عن كوباية مطاطية صغيرة بتتحط في فتحة المهبل بعد التعقيم وبتخرجيها تفضيها وتنضفيها وترجعيها تاني في المهبل، ولما البريود تخلص بتعقميها تاني وتشليها- بس بالنسبة لمنة هي أسهل حاجة وهي في هايك أو بتتسلق أوحتى في المياه، منة استخدمت الـcup وهي في رحلة hike في نيبال، وكاليفورنيا، وحتى وهي بتتسلق في سيناء، ساعدها في مغامرات كتير؛ هي بس لازم تعمل حسابها في مياه زيادة.

فيه ناس تانية بتفضل إنها تأجل البريود خالص وتريح نفسها من وجع الدماغ ده، وده بيكون باستخدام حبوب منع الحمل أو أي نوع أدوية، طبعاً الحل ده أريح واحد لأن مهما كنتي متحضرة ممكن يطلعلك خازوق، وقبل ما تاخدي القرار ده لازم تتكلمي مع الدكتور عشان توصلوا للدواء الأنسب، أو تتجهي للوصفات البيتي المتجربة، وقبل ما الحماسة تاخدك خليني أقولك إن مفيش أبحاث بتأكد أي حاجة أنا هقولها غير إن أختي جربت الحل ده عشان تأجل البريود وإحنا في رحلة لليونان الصيف اللي فات، بعد لما دوّرت حبة على الإنترنت ولقت الحل شُرب خل تفاح كل يوم قبل أيام البريود وطول الأيام اللي انتي عايزة تأجلي فيها، وده نجح معاها وأجلت البريود 10 أيام، بس مفيش أي حاجة تثبت ده ويمكن ده يكون حظها، وخليكي عارفة إن ده خل يعني طعمه وحش.

المصدر: G Adventures

أكبر مخاوفنا هو الوجع

أكتر حاجة بنشيل همّها هي الوجع، لما بتكوني في سريرك مع قربتك وأكلك الموضوع بيعدّي بمعاناة بس بيعدي، إنما بقى لو في الجبال ده رعب فوق الرعب، وبالنسبة لزينة ومنة دى كانت من أكبر الحاجات اللي شغلت تفكيرهم، زينة كانت بتدي نفسها وقت راحة أطول لما الوجع بيكون جامد، منة لما كانت بتكون مش قادرة تمشي تاني كانت بتركب جمل، أو بتدي نفسها فترات راحة أطول برضه، لكنها لاحظت إنها لما بتكون بتتحرك ده ساعد في تخفيف الوجع، وبيخليها ترجع لنشاطها أسرع من لما بتكون مريحة، النصيحة الأهم إنك تسمعي لجسمك وتعملي اللي محتاجاه، وطبعاً اعتمدي على المسكنات.

البريود جزء من كوننا ستات، وجزء مهم من إن البشرية تكمل ويكون فيه حياة فمش معقول تكون بتوقفك عن حياتك، روحي الجبال والصحراء والمياه وكل المغامرات، كوني بس محضرة نفسك وجربي حاجات مختلفة لغاية لما تلاقي الأنسب ليكي. منة قالت إنها من يوم ما حبت الهايكينج والحياة البرية مفوتتش مغامرة بسبب البريود، "أنا بتعامل معاها وبقيت دلوقتي عارفة أكتر أنا هعمل إيه، وعارفة كويس إني هكون موجوعة بس الأحسن أتوجع في مكان جميل مش في البيت."

ترجمة: جينا رأفت