share this article

الحياة عمرها ما كانت سهلة بالنسبة للستات، ما بين التفرقة في المعاملة على حسب الجنس، لنظرة المجتمع للستات والمحاولات المستمرة لفرض اختيارات معينة عليهم، للوصم اللي مبيخلصش لأي واحدة بتعمل حاجة بره المألوف، لحاجات تانية كتير، الستات بيعانوا في كتير من الأوقات وبالأخص في منطقة زي الشرق الأوسط. السفر مش المفروض يبقى من الحاجات اللي مكتوب على الستات يتكدروا فيها كمان، ولحسن الحظ التكنولوجيا ساعدت شوية في تقليل وجع الدماغ للستات في السفر، ووفرت حاجات كتير هتخلي رحلتك أسهل.

Menstrual Cup
المصدر: Patricia Moraleda

ممكن بنات كتير يحسوا إن استعمال دي فيه مشكلة، بس المنتج ده مش بيؤثر على العذرية خالص، وممكن تستعمليه أكتر من مرة، ويقدر يشيل دم الدورة من 8 إلى 12 ساعة – وده أكتر من معظم الفوط الصحية بكتير. والأهم من ده إنه ينفع تستعمليه وإنتي بتعومي.

تشتريهم منين: Organicup Egypt

Period Panties
المصدر: Thinx

لو مش مرتاحة لفكرة ال menstrual cups والفوط الصحية مش بتريحك، المنتج ده هينفعك جدًا. هتلاقيهم مريحين ومش بيضايقوكي وبيخلوا حركتك سهلة ومريحة. ودي برضه تستعمل كذا مرة وممكن تتغسل بعد كل استعمال. الفكرة إنها مش بتشيل كمية كبيرة وهتحتاجي 2 تبدلي بينهم، وغاليين شوية. وبرضه مينفعش يتلبسوا لفترات طويلة علشان ممكن يعملوا رائحة مش ظريفة.

تشتريهم منين: دول صعب تلاقيهم في مصر، بس ممكن تشتريهم من بره مصر وإنت مسافرة أو تخلي حد يشتريهولك وهو جي من THINX أو Amazon 

Go Girl

المصدر: Loriver

ده مناسب للتخييم وأي رحلات سفر فيها تعسيف، لومفيش غير حمام بلدي مثلًا ولياقتك البدنية مش مساعداكي. ببساطة هتستعملي ده وهيسمحلك تخشي الحمام وانتِ واقفة ومفيش حد أحسن من حد.

تشتريه منين: موجود على سوق.كوم

Aloe Vera Gel
المصدر: Miguel Sol

الجل ده ليه فوائد كتير زي إنه مضاد للإلتهابات وبيطري الجلد، ويعتبر أحسن حاجة طبيعية تستعمليها وإنت بتحلقي. الظريف إنه كمان ممكن يُستعمل جل شعر وعلاج فعال للحروق.

تقدري تشتريه منين: أي فرع لـ The Body Shop

Sports Bra
المصدر: Max Pixel

البرا الرياضي واخد سمعة وحشة بس ليه مميزات كتير، بيعيشوا معاكي، ومريحين في الاستخدام، والحمد لله التكنولوجيا تطورت مبقاش البرا الرياضي بيخليكي تحسي إن عندك فردة بدل 2. ممكن تجربي البرا الرياضي اللي بسوستة قدام وده مريح جدًا، وممكن تجربي اللي من غير سوستة وشبه العادي. لو مقاس البرا بتاعك من D أو DD فأكتر، دوري على برا رياضي متبطن من جوا علشان راحتك. وفي جميع الأحوال دوري على حاجة ينفع تستعمليها ك Crop Top.

تقدري تشتريه منين: أي محل مستلزمات نسائية

Waterproof Travel Money Belt
المصدر: Go Travel

دي شنطة وسط تقدري تخفيها تحت هدومك، وتشيلي فيها فلوسك والكريديت كاردز، والباسبورت، وأي ورق مهم. دوري على واحدة تكون ضد المياة بالذات لو مسافرة لوحدك، علشان تقدري تلبسيها وإنت في المياة أو في الدش.

تقدري تشتريه منين: سوق.كوم أو جوميا أو Virgin Stores

Toilet Wipes


المصدر: Daily Mail

تخيلي لو حبيتي تخشي الحمام في مطعم في ألمانيا مثلًا أو أي حتة تانية مفيهاش أعظم اختراع شرقي، الشطافة، هتتصرفي ازاي؟ الوايبس دي معمولة مخصوص للمواقف اللي زي كده وهتخليكي تخشي الحمام بقلب جامد حتى لو في الصحراء.

تشتريها منين: دي متاحة في كل الصيدليات

Travel Line
المصدر: Leyna Faye Singh

مفيش حاجة تمنع إنك تاخدي فساتينك معاكي اللي عمرك ما هتعرفي تلبسيها في مصر مثلًا أو كتير من الدول اللي جنبها، الحبل ده زي حبل الغسيل بتوصليه لأي حاجة في الأوضة علشان تعلقي عليه لبسك ينشف بالليل وتوفري فلوس الغسيل بتاعت الفندق، حبل الغسيل هيوفر عليكي كل ده.

تشتريها منين: أي محل مستلزمات منزلية

Packing Cubes
المصدر: jdltmaxson

دول بيخلوكي تشيلي هدوك بشياكة شوية ومن غير كرمشة – طالما مش هتحشري الهدوم في الشنط الصغيرة دي. الاختراع ده بيخليكي تنظمي دنيتك وتوفري مساحة في الشنطة الكبيرة، وكمان ممكن تستعمليه كمخدة في المطار، هيبقى مريح ومحشي هدوم وطري كده.

ممكن تشتريها منين: جوميا

Kitchen Paper Tube
المصدر: RoonakTube

الايشارب أو الكوفية  لو اتحطوا في الشنطة غالبًا هيطلعوا مكرمشين وزي ما يكونوا طالعين من بق كلب، فا لو لفيتي الحاجة حوالين الأسطوانة الخشب اللي بييجي ملفوف حواليها الفويل أو الأكياس، الايشارب هيطلع من الشنطة زي ما دخل.

تقدري تشتريها منين: أي كرتونه باقية من علبة فويل أو مناديل المطبخ.

Perfume Atomizer

المصدر Go travel

دي بخاخة صغيرة بتتملي بيرفيوم بدل ما تاخدي معاكي الازازة كلها، فتوفري حجم ووزن، ده غير احتياطات السلامة اللي بتفرضها المطارات تخليها عملية أكتر من إنك تاخدي الإزازة كاملة.

ممكن تجيبيها منين: Aliexpress

 Portable Travel Empty Cosmetic Containers
المصدر picclick

ليه تاخدي الكريمات كلها بعليها لما ممكن تعبيها في ازايز كريمات فاضية وتاخديها معاكي، هتوفر مساحة ووزن، وهتخلي حاجتك دايما مترتبة ومش خايفة حاجة تقع في الشنطة وتبهدل الهدوم.

ممكن تشتريها منين:  aliexpress