share this article

متعودين عندنا إننا نسمع عن يوم في حمام السباحة للبنات أو شواطىء للبنات؛ بس واضح إن الموضوع مبقاش حصري للدول العربية اللي البنات فيها نظراً لظروف كتير بيبقوا بيدوروا على الخصوصية؛ لكن الموضوع وصل لدول أوروبية وعملوا في أسبانيا فندق جديد مخصص للبنات بس في كل تفصيلة من تفاصيل المكان.

أصحاب الفندق أخدوا القرار إنهم يعملوه بالمواصفات دي بعد ما شافوا إن فيه احتياج في السوق لفنادق مخصصة بالشكل ده، وإن البنات في مجتمع المسافرين بقوا يدوروا على حاجة متفصلة ليهم زي الكافيهات أو أماكن الشغل co-working spaces أو النوادي الرياضية المخصصة للبنات بس، مش بس عشان الخصوصية لكن كمان عشان يلاقوا عروض وخدمات معمولة للبنات ومناسبة لإحتياجاتهم، وبشكل أخص للبنات اللي بتبقى بتسافر وتلف العالم لوحدها وبتدور على نسبة أكبر من الأمان في المكان اللي هتقضي فيه سفريتها.

وعشان كده الفندق بيركز في كل تفصيلة على الحس البناتي؛ من أول الديكورات وشكل الأوضة والسرير والمفروشات والألوان؛ لحد الأكل والمشروبات الملونة اللي غالب عليها اللون البينك، غير كمان إن القائمين على الفندق أكدّوا إن معظم اللي بيشتغلوا في الفندق هيبقوا بنات، مع أقل نسبة من الرجال في وظائف معينة.

المصدر: Lonely Planet