share this article

مصر مش أريح مكان البنات يقدروا يلبسوا فيه اللي هما عايزينه، وعلى الرغم إن على مر التاريخ مصر كانت معروفة بإن ستاتها قوية لدرجة انهم مسكوا الحكم، لكن البلد والموروثات مش بتعامل الستات أحسن معاملة. مصر برضه فيها مجموعة من أجمل شواطىء العالم وأجمل أماكن للعوم والغوص، ومفيش سبب يمنع إنك تستمتعي بالأماكن دي وإنت لابسة البيكيني بتاعك. زي ما كل حاجة في مصر بتتكلف فلوس، بالفلوس هتقدري تقعدي في فنادق ومنتجعات وتلبسي اللي إنت عايزاه. دي مجموعة أماكن في مصر تقدري تلبسي فيها بيكيني من غير ما تحسي إنك غريبة وسط الناس وإن كلهم مركزين معاكي.

العين السخنة:
المصدر: Flying Carpet Tours Egypt

يمكن العين السخنة مش بنفس شعبية الساحل، بس كل مكان وليه زبونه، القرى بتاعة العين السخنة بتتنوع مجتمعاتها، فيه منها المحافظ وفيه المنفتح، فالموضوع كله بيفرق في المكان اللي هتروحيه، بنرشحلك أماكن محدش هييصلك ويحكم عليكي أو على لبسك زي La Vista، و Tulip، و Stella di Mare، لو رايح يوم صدة ردة ممكن تروحي Clique Beach Club

مرسى علم:

مرسى علم فيها واحد من أحلي الشواطىء في الشرق الأوسط، Sharm El Luli اللي هو حتة من الجنة، المياه فيه صافية والأسماك من كل الألوان والأشكال. البدو في مرسى علم مضيافين ومحترمين، ومش بيهمهم مين لابس إيه، فلو عايزة حاجة مش مشهورة أوي زي الساحل والسخنة ممكن تروحي مرسى علم. المدينة فيها كل مميزات المصيف بس من غير الشواطىء الزحمة ومع بحر مش هتشوفي زيه. الدنيا في مرسى علم أمان من ناحية البيكيني، حتى الشواطىء العمومية زي Sharm El Luli و Abu Dahab. وفي كامبات ممكن تتراح زي Marsa Nakari و Marsa Shagara اللي فيهم شواطىء تلبسي براحتك فيهم.

مرسى مطروح:

مطروح برضه من أشهر المصايف، آه مبقتش أكتر حتة الناس بتصيف فيها بس برضه لسه ليها ناسها، بس مش هتبقي مرتاحة اوي بالبيكيني غير في حتت معينة زي الشاطىء الخاص بتاع Belle Vue Beau Site Hotel  وحتت معينة من شاطىء عجيبة، هتلاقي فيها بياع الفريسكا جمب البوركيني جمب البكيني، بس في الغالب الموضوع هينفع لو جروب مش لو لوحدك، لو لوحدك يبقى الفندق هو اختيارك الأفضل.

الجونة:

المصدر: El Gouna Real Estate
الجونة مدينة مرحرحة، امشي فيها براحتك تماما، كل الأماكن بيئة آمنة لكل الناس، ربنا يباركلنا في آل ساويرس.
الساحل الشمالي:

المصدر: LoveByN
الساحل معروف إنه مركز الحياة الصيفية في مصر، الموسم بيبتدي بعد الامتحانات علطول أو بعد رمضان أيهما أقرب، أكبر حفلات وأكبر نوادي ليلية في مصر بيتواجدوا فيه. الساحل كمان المكان اللي أغلب أبناء الطبقة المتوسطة واللي أعلى بيصيفوا فيه، وده بيبان في الحرية اللي متاحة للبنات يلبسوا اللي عايزينه، ممكن تتأكدي إن الفندق بتاعك فيه حمامات سباحة خاصة عشان تبقي مرتاحة أكتر أو تروحي مكان نضيف حبتين زي مراسي، تلال، وأمواج، هاسيندا.. الخ.

دهب:

المصدر: Olivia Heredia
دهب جميلة وناسها أجمل، ماحدش بيبص لحد، تقدري تمشي هناك براحتك سواء على الممشى أو في الفندق، الجميل كمان انها زيها زي مرسى علم ورأس شيطان، أماكن ما بتضغطش علينا، مش محتاجة تمشي عينك في وسط رأسك.


نويبع (رأس شيطان):
via NTalka
رأس شيطان تحسيها لالا لاند في نفسها، بوب مارلي نفسه عامل كامب، معظم الكامبات دي متركزة في حتة واحدة عشان الأمان ومش كل حتة فيها مياه ممكن تتنزل. غير كده، الدنيا لطيفة والشواطىء مريحة ومش زحمة، ممكن تروحي هناك كامب الدايرة، المعجنة، دروب، كاستل زمان...

الإسكندرية:
via Saoud Elghannam  
أقدم مصيف في مصر وبقالها سنين المكان المفضل للمصيف لناس كتير، بس زي مصر الإسكندرية فيها تغيرات إجتماعية كتير –زمان كان شواطىء الإسكندرية مفتوحين وعموميين وبيتراحوا من أي حد بس مع مرور الزمن الدنيا بقيت محافظة أكتر شوية فمبقاش سهل لبس البيكيني في أي حتة. فبلاش تلبسيه في شاطىء عمومي وخليكي في فندق ليه شاطىء خاص زي Sheraton Montazah و Helnan Palestine Hotel اللي ممكن تقضي فيهم اجازة سريعة ولطيفة.
فيه مكان تاني لطيف وعمومي هو "النادي اليوناني" جمب قلعة قايتباي، مرة سألناهم وقالولنا ينفع حد غير الأعضاء ينزل ومرة قالوا ما ينفعش، مفيش مانع من التجربة لو انتي كده كده هناك.

رأس سدر:
via Igor Larkov

رأس سدر برضه فيها تنوع في ثقافة اللبس على البحر، دي أقرب حتة للقاهرة ناحية سيناء وشواطئها جميلة. ممكن راس سدر تبقى زحمة شوية، بس المياه والجو الجُمال بيخلوها مكان مثالي للإجازة. في أماكن كتير ممكن تلبسي فيها بيكيني في رأس سدر زي Matarma Bay Hotel و La Hacienda اللي هي كومباوند مقفول فممكن تأجري شقة أو تقعدي في الفندق.

سيوة :

ٍالمصدر Siwa-tourism blogspt

سيوة واحة جوه مصر لكن طول الوقت اللي هتقضيه مناك هتحسي أنك بره الدنيا, عادي أنك تلبسي أي حاجة ومفيش حد هيكلمك. البسي البكيني بتاعك عادي جدا واتنزلي, الناس متعودة على السياحة والسياح بس هم أصلا مبيضيقوش حد.

الأقصر وأسوان :

المصدر reddit

من أكتر المدن اللي مشهورة بالآثار والحضارة والتاريخ, بس أنك تعومي في النيل دي تجربة مختلفة وأحلى من الرحلة العادية, ودي مدن سياحية فتقدري تلبسي البكيني بتاعك عادي جدا جدا.